İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 115 Hüküm no: 74 Orijinal metin no: [10a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. İvaz’ın dükkan gediğini bedeli karşılığı Artin v. Sahak’a devrettiği Gedik mübâya‘ası Ma‘rûz İstanbul’da Kumkapı dâhilinde Balipaşa Mahallesi’nde mütemekkin Arakil v. İvaz nâm zimmî meclis-i şer‘-i münîrde Artin v. Sahak zimmî muvâcehesinde takrîr-i kelâm edip İslâmbol’da Mahmudpaşa câmi‘-i şerîfi kurbünde müteveffâ Rüstempaşa evkāf-ı şerîfi müstagallâtından Sultan odaları demekle ma‘rûf han derûnunda kâin fevkānî ve tahtânî altmış bir bâb oda ve kahvehâne ve han-ı mezkûr dâhilinde kapı arasında kâin iki bâb dükkânlar ve han-ı merkūmdan olmak üzere han-ı mezkûr hâricinde kâin altı bâb dükkânlarda mevcûde gedik tâ‘bir olunur işbu bir kıt‘a fermân-ı âlî mantûkunca mülk-i müşterâm olan âlât-ı lâzıme-i ma‘lûmelerden hân-ı mezkûrda fevkānî yedi bâb oda ve tahtânî on yedi bâb oda ve kapı arasında bir bâb dükkân ve hân-ı mezkûr hâricinde iki bâb dükkân gedikleri olan âlât-ı lâzıme-i ma‘lûmelerimi bundan akdem semen-i ma‘lûm ve ve makbûza âhara bâ-i‘lâm-ı şer‘î bey etmişdim el-hâletü hâzihi hân-ı mezkûr kapısının sağ tarafı ittisâlinde vâki‘ bir bâb dükkân derûnunda mevcûde gedik tâ‘bir olunur âlât-ı lâzıme-i ma‘lûmelerimi bi-safkatin vâhidetin mesfûr Artin zimmîye iki yüz eli guruş semen-i makbûza bey‘ ve temlîk ve teslîm eylediğimde ol dahi ber-veh-i muharrer iştirâ ve temellük ve tesellüm ve kabûl eylediğinden sonra mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini kabûlü hâvi ibrâ ve iskāt eyledik ba‘de’l-yevm zikr olunan dükkân gediği âlâtında benim alâka ve medhalim kalmayıp mersûm Artin zimmînin mülk-i müşterâsı olmuşdur deyü ba‘de’l-ikrâr ve’t-tasdîk mârrü’l-beyân dükkân gediği mesfûr Arakil zimmî üzerinden ref‘ ve terkīn ve mesfûr Artin zimmî üzerine kayd ve yedine sûret i‘tâ buyrulmasını istid‘â eyledikleri İslâmbol Mahkemesi’nden huzûr-ı âlîlerine i‘lâm olundu. Fî-17 min-L sene [1]216