İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 116 Hüküm no: 75 Orijinal metin no: [10a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tabib Seyyid Mehmed Efendi b. Ali’nin çocukları Seyyid Ali ve Şerife Fâtıma’ya nafaka tayini Nafaka-yı sagīrânın mâh be-mâh edâsı iktizâ eylediği Ma‘rûz Müderrisin-i kirâmdan sâhib-i arzuhâl Tabib es-Seyyid Mehmed Efendi b. el-Hâc Ali meclis-i şer‘-i münîrde arzuhâlde mezkûre sâbıkā zevcesi zâtı mu‘arrefe Emine bt. Ahmed nâm Hatun mahzarında mezbûre Emine Hatun ile mukaddemâ zevciyet beynimizde kāime iken firâşından hâsıllar ve zevcem mezbûreden mütevellîdler olan sulbî sagīr evlâdları es-Seyyid Ali ve Şerîfe Fâtıma’nın malları olmamağla nafakaları için her birine yedişer guruşdan cem‘an on dört guruşar bâ-hüccet farz ve takdîr olunup lâkin meblağ-ı mefrûz-ı mezkûru benim vermeğe iktidârım olmamağla bir mikdârı hat ve tenzîl olunması murâdımdır deyü da‘vâ ettikde ol dahi cevâbında meblağ-ı mefrûz-ı mezkûru zevc-i sâbıkım mezbûrun vermeğe iktidârı olup kadr-i ma‘rûftur deyü iddi‘â ve fi’l-hakīka meblağ-ı mezkûr tarefeynin haline nazaran kadr-i ma‘rûf oluğunu es-Seyyid Mustafa b. es-Seyyid el-Hâc Mehmed ve diğer Mustafa b. Halil nâm kimesneler bi’l-muvâcehe alâ-tarîkı’ş-şehâde haber vermeleriyle meblağ-ı mefrûz-ı mezkûr on dört guruşu mâh be-mâh mezbûre Emine Hatun’a edâ ve teslîm eylemesi iktizâ eylediği merkūm es-Seyyid Mehmed Efendi’ye tefhîm olunduğu İslâmbol Mahkemesi’nden huzûr-ı âlîlerine i‘lâm olundu. Fî-21 min-Şevvâli’l-mükerrem sene [1]216