İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 116 Hüküm no: 76 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ esnafından Mustafa ve oğlu Halil’in nizama aykırı davranmaları sebebiyle ihraç edilmeleri Debbâğ esnâfından ihrâc Ma‘rûz İslâmbol’da Yedikule debbâğlarında Ahi Baba el-Hâc Ahmed Ağa ve yiğitbaşı Molla İsmail ve ustalarından es-Seyyid el-Hâc Ahmed Efendi ve el-Hâc Hüseyin ve es-Seyyid el-Hâc Halil ve Süleyman ve el-Hâc Lütfullah ve Zekeriya ve Molla Halil ve kerdemancıbaşı? İsmail ve Ali ve Mehmed ve Ahmed ve es-Seyyid Ahmed ve İbrahim ve es-Seyyid Mehmed Râşid ve es-Seyyid Molla Mehmed vesâirleri meclis-i şer‘-i münîrde esnâf-ı mezkûreden el-Hâc Mustafa Usta ve oğlu Halil muvâcehelerinde mezbûrân el-Hâc Mustafa ve oğlu Halil esnâfımızdan olup lâkin kendi hallerinde olmayıp nizâm ve i‘tibârımıza muhill-i harekât-ı nâ-bercâya ictisâr etmeleriyle bi’d-defa‘ât kendilere nush u pend eylediğimizde ısğâ etmemeleriyle merkūmândan bir vechile emniyet ve rahatımız yokdur deyü bi’l-muvâcehe teşekkî ve san‘at-ı mezkûreden ihrâc olunmalarını istid‘â eylediklerinde onlar dahi cevâblarında fîmâ ba‘d san‘at-ı mezkûreyi i‘mâl etmeyip âhar ticârete sülûk ve esnâf-ı mezkûreye dâir umûr-ı husûslarına karışmamak üzere her biri ta‘ahhüd eyledikleri İslâmbol Mahkemesi’nden huzûr-ı âlîlerine i‘lâm olundu. Fî-19 min-Şevvâli’l-mükerrem sene [1]216