İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 117 Hüküm no: 77 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Mefer’in dükkân kirasını Oseb’e ödemesi gerektiği İcâreyi edâsına kefîl Ma‘rûz Keresteci esnâfından Aslan v. Norsis nâm zimmînin oğlu ve tarafından husûs-ı âtî’l-beyânında vekîl olduğu Mustafa b. Musa nâm kimesne ile Serkiz v. Toma zimmî şehâdetleriyle sâbit olan Oseb nâm zimmî meclis-i şer‘-i münîrde keresteci Serkiz v. Makar zimmî muvâcehesinde İslâmbol’da Çatladıkapı dâhilinde vâki‘ bir bâb keresteci dükkânı derûnunda mevcûde beyne’l-esnâf gedik tâ‘bir olunur âlât-ı lâzımenin nısfı babam ve müvekkilim mersûmun ve nısf-ı âharı dahi işbu Serkiz zimmînin mülkleri ve derûnunda babam mesfûrun iki yüz elli guruş sermâyesi olmağın babam ve müvekkilim mersûm âlât-ı mezkûrede olan nısf hissesini işbu târih-i i‘lâm senesi Cumâdelâhiresinin sekizinci gününden beher mâh sekizer guruşa mesfûr Serkiz zimmîye îcâr ve teslîm ol dahi istîcâr ve kabûl etmekle icâre-i mezkûreden işbu târih-i i‘lâm-ı şehrî gāyetine gelince müctemi‘a olan otuz yedi guruş otuz dört para iki akçeyi mersûm Serkiz zimmî bana def‘ ve teslîm ben dahi bi’l-vekâle kabz eyledim deyü vekîl-i mersûmun takrîrini mersûm Serkiz zimmî tasdîk ve fîmâ ba‘d icâre-i mezkûreyi mâh be-mâh edâya ba‘de’t-ta‘ahhüd icâre-i mezkûrenin edâsına mersûm Serkiz zimmînin oğlu işbu hâzır bi’l-meclis Karabet zimmî kefîl ve zâmin olduğu tescîl ve İslâmbol Mahkemesi’nden huzûr-ı âlîlerine i‘lâm olundu. Fî-21 min-Şevvâl sene [1]216