İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 118 Hüküm no: 78 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Nefise bt. Hacı Ali’nin boşandığı eşi Yusuf, üvey babası Mustafa ve annesi Şerife Ayşe’nin bir birlerinin zimmetini ibra ettikleri Ma‘rûz Mahrûse-i Galata’da Alaca Mescid Mahallesi sâkinelerinden olup zikri âtî husûsdan afîfe ve sâlime olduğu zâtını ârifân mahalle-i mezbûrede imâm vekîli Ali Efendi b. Ali ve Müezzini es-Seyyid Molla Tahir ve ahâlîsinden el-Hâc İbrahim ve Kalafatçı es-Seyyid İsmail ve Kayyım Ahmed Efendi ve diğer el-Hâc İbrahim ve Mehmed Sâdık ve es-Seyyid Molla Süleyman ve es-Seyyid Mahmud ve Mehmed Emin Efendi ve diğer Ahmed ve civârında vâki‘ Emeksiz Mahallesi ahâlîsinden Serdengeçti Mustafa Ağa ve Mazlum Ömer Ağa nâm kimesneler haberleriyle zâhir ve mütehakkık olan Şerîfe Nefise bt. el-Hâc Ali nâm hatun meclis-i şer‘-i münîrde vâlidesi zâtı mu‘arrefe Şerîfe Âişe ve üvey pederi Mustafa hâzır oldukları hâlde sâbıkā zevci Yusuf mahzarında mezbûr Yusuf bundan akdem yüz guruş <> tesmiyesiyle beni tezevvüc ve mehr-i mu‘accelimi bana def‘ ve teslîm edip halvet-i sahîha bulunduktan sonra mâlâyani isnâdıyla zifaf gecesi beni tatlîk ve mehr-i mu‘accelim olan yüz guruş ile ol gece bana hibe ve teslîm ben dahi kabz eylediğim bir sim sa‘ati zevcim merkūm fuzûlen ahz etmekle hâlâ istirdâd ederim deyü da‘vâ eylediğimde ol dahi ber-vech-i muharrer müdde‘âmı ikrâr ve meblağ-ı mezkûr yüz guruş ile zikr olunan sim sa‘ati işbu meclis-i şer‘de bana def‘ ve teslîm ve mehr-i müeccelim olan yüz guruş ile nafaka-i iddetim için bi’t-terâzi ta‘yîn olunan on guruşu mukaddemâ ahz etmemle hukūk-ı zevciyete ve bi’l-cümle sâir hukūk-ı şer‘iyyeye müte‘allika âmme-i de‘âvî ve kâffe-i mütâlebâtdan ben üvey pederim ve vâlidem hâzırân-ı merkūmândan her birimiz merkūm Yusuf’un zimmetini ibrâ-yı âm ile ibrâ ve iskāt eylediğimizde ol dahi hukūk-ı zevciyete ve bi’l-cümle sâire müte‘allika âmme-i de‘âvî ve kâffe-i mütâlebâtdan benim ile üvey pederim ve vâlidem hâzırân-ı merkūmândan her birimizin zimmetlerini ibrâ-yı âm ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasâduk bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-20 min-Şevvâl sene [1]216