İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 119 Hüküm no: 81 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazıkçı Hasan Ağazâde Mehmed Emin’in, Mehmed Ağa’daki alacağını kefaletinden dolayı Sarraf Yorgi v. Vasil’den istemesi Mazbata derkenârı Ma‘rûz Arzuhâlde mezkûrü’l-ism Kazıkçı Hasan Ağazâde Mehmed Emin nâm kimesne tarafından ber-vech-i âtî vekîl olduğu Osman Ağa b. Abdullah ve Süleyman b. Mehmed nâm kimesneler şehâdetleriyle sâbit olan Derviş el-Hâc Hasan Efendi b. Mehmed meclis-i şer‘-i münîrde arzuhâl eden Sarraf Yorgi v. Vasil zimmî muvâcehesinde müvekkilim mezbûr Mehmed Emin’in dergâh-ı âlî kapıcı başılarından müteveffâ Mehmed Ağa zimmetinde cihet-i karzdan bâ-temessük alacağı olan altı bin altı yüz guruşun edâsına mersûm Yorgi zimmî kefîl ve zâmin oldukdan sonra meblağ-ı mezkûrun beş bin dokuz yüz elli guruşunu asîl-i merkūm hayatında müvekkilim mezbûre edâ etmekle bâkīsi olan altı yüz elli guruşu kefâletine binâen mersûm Yorgi zimmîden bi’l-vekâle taleb ederim deyü da‘vâ ettikde ol dahi cevâbında işbu yedimde olup bin iki yüz on beş senesi Zilka‘desinin yirmi beşinci günü târihiyle müvarrah kazâen imzâsı mahallî şak olan bir kıt‘a kat‘-ı alâka tahvîli nâtık olduğu üzere asîl-i merkūm Mehmed Emin-kefâlet-i mezkûreden beni ihrâc ve husûs-ı mezkûra müte‘allika da‘vâdan benim zimmetimi ibrâ ve iskāt etmişdi deyü ba‘de’d-def‘ ve’l-inkâr dâfi‘-i mersûm ber-vech-i muharrer def‘ine Vekîlharc İsmail Ağa b. Ali nâm kimesne şehâdet, şâhid-i âhar ikāmesine havâle olundukda vekîl-i mezbûr terâfu‘dan ibâ vü imtinâ‘ etmekle henüz da‘vâlarına faysal verilmediği cerîdemizde mazbût olmağın sâdır olan fermân-ı âlîlerine imtisâlen İslâmbol Mahkemesi’nden huzûr-ı âlîlerine i‘lâm olundu. Fî-21 min-Şevvâli’l-mükerrem sene [1]216