İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 120 Hüküm no: 82 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Halil Ağa’nın sahilhane dükkânları vakfiyesinin sahih olduğu Tevliyet tevcîhi Ma‘rûz Sâdır olan fermân-ı âlîlerine imtisâlen bin iki yüz on beş senesi Rebî‘ülâhirinin on yedinci günü târihiyle muvarraha hâlâ Gerede kazâsı nâibi Mahmud Esiri Efendi dâ‘îlerinin imzâ ve hatmini havîye kazâ-i mezbûr ahâlîsinden sâhib-i arzuhâl el-Hâc Halil Ağa on bir bâb selhhâne dükkânlarını vakf-ı sahîh ile vakf ve tevliyetini evvelâ kendiye ve ba‘dehû evlâd-ı evlâdına şart eylediğini nâtıka bir kıt‘a vakfiyeye nazar olundukda sarâhaten te’bîd zikr olunmayıp lâkin kavl-i müftâ-bih üzere vakfı sahîh olmağın mazmûnu şer‘-i şerîfe mutâbık ve sebk-i serdi üslûb-ı sakka muvâfık her vechile ihticâca sâliha ve istid‘â eylediği Anadolu kalemine kayda şâyeste olmağla ba‘de’l-kayd şartı mûcebince tevliyet-i mezkûre kendiye tevcîh ve yedine berât-ı âlişân inâyet ve ihsân buyrulması ricâsında olduğu İslâmbol Mahkemesi’nden huzûr-ı âlîlerine i‘lâm olundu. Fî-15 min-Şevvâli’l-mükerrem sene [1]216