İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 123 Hüküm no: 88 Orijinal metin no: [11b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. Şemon’ın zaptettiği odayı Tabib Mustafa Efendi’ye teslim etmesi gerektiği Oda teslîmine tenbîh Ma‘rûz İstanbul’da Mûytâblar sûku verâsında vâki‘ Kebapçıhanı demekle ma‘rûf bir bâb handa kâin zikri âtî odaya bi’l-îcâreteyn mutasarrıf olan Tabib Hâfız Mustafa Efendi meclis-i şer‘-i münîrde İsak v. Şemon nâm Yahûdi muvâcehesinde hân-ı mezkûrun tabaka-i ulyâsında sol tarafda kâin mutasarrıf olduğum bir bâb odayı mersûm İsak Yahûdi fuzûlî zabt etmekle oda-i mezkûreden keff-i yed ve bana teslîme mersûm İsak Yahûdi’ye tenbîh olunması murâdımdır deyü da‘vâ ettikde ol dahi cevâbında oda-i mezkûr gediğini David v. Şemşon nâm Yahûdiden iki yüz otuz guruşa bâ-hüccet ben iştirâ etmemle ol vechile gediği benim mülküm olmuş olmağın zabt ederim demesi hân-ı mezkûrun oda gediği aklâmda mukayyed ve mu‘teber gediklerden olmadığını mu‘terif olmağla havayı gedik da‘vâsına iltifât olunmayıp oda-i mezkûru tahliyye ve müdde‘î-i merkūm Mustafa Efendi’ye teslîme ve mersûm İsak Yahûdi’ye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-25 min-Şevvâli’l-mükerrem sene [1]216