İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 124 Hüküm no: 89 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi Abdülkadir b. Hüsameddin’in, İsmail b. Osman’a olan borcunu ödemesi gerektiği 77 guruşa sulh Ma‘rûz İsmail b. Osman nâm kimesne meclis-i şer‘-i münîrde Simitçi Abdülkādir b. Hüsameddin mahzarında merkūm Abdülkādir zimmetinde bundan akdem beher kıyyesi yirmi ikişer akçeye olmak üzere yedimden ve malımdan iştirâ ve kabz eylediği bin seksen kıyye dakīk-i has semeninden yüz doksan sekiz guruş alacağım olup meblağ-ı mezkûrun kırk guruşunu bana edâ etmekle bâkīsi olan yüz elli sekiz guruşu hâlâ taleb ederim deyü tasaddî eylediğim da‘vâmdan mezbûr Abdülkādir ile kat‘an li’n-nizâ‘ an ikrâr yetmiş yedi guruşa sulh olduğumda ol dahi sulh-i mezkûru ba‘de’l-kabûl ziyâde müdde‘âma müte‘allika da‘vâdan merkūm Abdülkādir’in zimmetini kabûlü hâvi ibrâ ve iskāt eyledim deyü takrîrini mezbûr Abdülkādir ba‘de’t-tasdîk bedel-i sulh-i mezkûr yetmiş yedi guruşu müdde‘î-i mezbûr İsmail’e edâ ve teslîme merkūm Abdülkādir’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-23 min-L sene [1]216