İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 125 Hüküm no: 91 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah bt. Osman’ın, eşi Attar Seyyid Mehmed Çelebi b. Hüseyin’e itâat etmesi gerektiğinin tenbihi İtâ‘ate tenbîh Ma‘rûz Derûn-ı arzuhâlde mezkûrü’l-ism Attâr es-Seyyid Mehmed Çelebi b. Hüseyin meclis-i şer‘-i münîrde hâlâ zevcesi arzuhâlde mezkûre Nimetullah bt. Osman Ağa nâm Hatun’un hâli ve tarafından husûs-ı âtî’l-beyânda vekîl olduğu zâtını ârifân es-Seyyid Hamza b. es-Seyyid Hasan ve Hasan b. Mehmed nâm kimesneler şehâdetleriyle sâbit olan Mustafa Ağa b. Mehmed nâm kimesne mahzarında müvekkile-i mezbûre Nimetullah Hatun beş yüz guruş mehr-i müeccel ve dört yüz guruş mu‘accel müstevfâsıyla zevce-i medhûlün-bihâm iken menzilimden firâr ve nâşizeten babası merkūm Osman Ağa’nın menzilinde sâkine olmağla suâl olunup zevcem mezbûre menzilime gelip bana itâ‘at ve hukūk-ı zevciyete mürâ‘atına zevcem mezbûre için vekîl-i mezbûra tenbîh olunması murâdımdır deyü da‘vâ ettikde vekîl-i mezbûr dahi cevâbında müdde‘î-i mezbûra müvekkilesi merkūme Nimetullah Hatun’un zevci olduğunu ve mehr-i mu‘accelini istîfâ eylediğini bi’l-vekâle ikrâr lâkin müdde‘î-i mezbûr büyût-ı adîdeyi müştemil menzilinin bir odasında hâletesi Âişe nâm hatunu iskân eylediğine binâen müvekkilem mezbûre menzil-i merkūma gitmekden imtinâ‘ eder dedikde miftâh ve nakli zevcesinin yedinde olup müstakilleten sâkine olduğu odadan gayrı âhar odada hâletesini iskân eylemesi meşrû‘ olup ber-vech-i muharrer iskândan imtinâ‘ hilâf-ı şer‘ olmağla müvekkile-i mezbûre Nimetullah zevci mezbûrun menziline gidip itâ‘at ve hukūk-ı zevciyete mürâ‘atına müvekkile-i mezbûre için vekîl-i mezbûra tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-24 min-Şevvâl sene [1]216