İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 125 Hüküm no: 92 Orijinal metin no: [12a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma bt. İsmail’ın, boşandığı eşi Seyyid Mehmed Sâdık b. Osman aleyhine açtığı davada iddiasını ispat edemediğinden muarazadan men edildiği Mu‘ârazadan men‘ Ma‘rûz İstanbul’da Aksaray kurbünde Koğacı Dede Mahallesi’nde sâkine zâtı mu‘arrefe Şerîfe Fâtıma bt. İsmail nâm Hatun meclis-i şer‘-i münîrde sâbıkā zevci Kömürcü es-Seyyid Mehmed Sâdık b. Osman mahzarında merkūm es-Seyyid Mehmed Sâdık ile mukaddemâ zevciyet beynimizde kāime iken menzilim derûnunda mevcûde malım olan mecmû‘u yedi yüz otuz iki guruş kıymetli bâ-defter-i müfredât eşyâ-i ma‘lûmemi zevcim merkūm fuzûlî ahz etmekle mevcûde ise ağyanını müstehlike ise ba‘de’s-sübût kıymet-i mezkûrelerini taleb ederim deyü da‘vâ ettikde ol dahi cevâbında müdde‘iye-i mezbûrenin ber-vech-i muharrer müdde‘âsını inkârından mâ‘adâ zevcem mezbûreyi ba‘de’t-tatlîk târih-i i‘lâm senesi Ramazan-ı şerîfi gurresinde altmış guruş mehr-i müeccel ve yirmi beş guruş nafaka-i iddeti ile ol esnâda mütâlebe eylediği eşyâ da‘vâsından dahi benimle doksan iki guruşa sulh olmağla cem‘an yüz yetmiş yedi guruşu zevcem mezbûreye teslîm ol dahi ba‘de’l-kabz târih-i mezkûra gelince benim yed ve zimmetimde bir akçe ve bir habbe hakkı ve alacağı olmadığını ikrâr ve âmme-i da‘vâdan benim zimmetimi ibrâ ve iskāt ben dahi ibrâsını kabûl etmişdim deyü ba‘de’d-def‘ ve’l-inkâr dâfi‘-i merkūm es-Seyyid Mehmed Sâdık ber-vech-i muharrer def‘ini udûlden olup şehâdetleri makbûle olan Taşçı es-Seyyid Mehmed Emin b. Hasan ve Çorbacı Mehmed Ağa b. Hüseyin nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘iye-i mezbûre Şerîfe Fâtıma Hatun da‘vâ-yı mezkûresiyle merkūm es-Seyyid Mehmed Sâdık’a bî-vech-i şer‘î mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-24 min-Şevvâl sene [1]216