İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 127 Hüküm no: 95 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Mustafa ile kardeşi Kemhacı Emrullah Beşe’nin bir birlerinin zimmetini ibra ettikleri Ma‘rûz İslâmbol’da Silivrikapısı dâhilinde Karabaş Mahallesi’nde sâkine Nefise bt. el-müteveffâ Mustafa nâm Hatun meclis-i şer‘-i münîrde li-ebeveyn karındaşı Kemhacı Emrullah Beşe mahzarında babamız müteveffâ-i mezbûrun terekesinden hisse-i irsiyyemden karındaşım mezbûr ile alâ-tarîkı’t-tehârüc mukaddemâ iki yüz guruşa sulh olmamla bedel-i sulh-ı mezkûrun seksen guruşu mukābelesinde karındaşım mezbûr ile iştirâken mutasarrıf olduğumuz bir bâb vakıf menzilden nısf hissesini bâ-re’y-i mütevellî bana ferağ ve tefvîz ve bâkī yüz yirmi guruşunu dahi târih-i i‘lâmdan yüz yirmi bir gün tamamında bana edâ etmek üzere istimhâl eylediğinde ben dahi ba‘de’l-imhâl meblağ-ı bâkī-i mezkûrdan mâ‘adâ babamız müteveffâ-i mezbûrun bi’l-cümle terekesine ve husûs-ı mirâsına vesâir hukūk-ı şer‘iyyeye müte‘allika âmme-i da‘vâdan her birimiz âharın zimmetini kabûlü hâvi ibrâ ve iskāt eyledik deyü takrîrini mezbûr Emrullah tasdîk ve meblağ-ı bâkī-i mezkûr yüz yirmi guruşu ecel-i mezkûr hulûlünde edâya ta‘ahhüd eylediği İslâmbol Mahkemesi’nden huzûr-ı âlîlerine i‘lâm olundu. Fî-27 min-Şevvâli’l-mükerrem sene [1]216