İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 127 Hüküm no: 96 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Ali bin Abdullah’tan miras kalan dükkân gediği ve evin Hatice bt. Mehmed’e satıldığı Ma‘rûz İslâmbol’da Sultanahmedhan Câmi‘-i şerîfi civârında Kemeraltı nâm mahalde sâkin iken bundan akdem vefât eden Berber Ali b. Abdullah’ın verâseti zevcesi Âişe ile li-ebeveyn er karındaşı Ali ve diyâr-ı âharda olan li-ümmin-kız karındaşı diğer Ayşe’ye münhasıra olmak üzere zâtı mu‘arrefe zevce-i mezbûre Âişe ve merkūm Ali kendi nefsinden asâleten ve mezbûre diğer Âişe tarafından vekâleten meclis-i şer‘-i münîrde zikri âtî dükkân ve üzerinde olan menzile bi’l-îcâreteyn mutasarrıfe olan Hatice bt. Mehmed nâm Hatun’un damadı ve tarafından bey‘-i âti’z-zikri tasdîka vekîl olduğu zâtını ârifân es-Seyyid Ahmed b. el-Hâc Süleyman ve Mehmed b. Süleyman haberleriyle zâhir olan müşârun-ileyhin vakfı kâtibi es-Seyyid Ahmed Efendi b. İbrahim mahzarında müvekkile-i mezbûrenin menzili tahtında vâki‘ bir bâb berber dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme mûrisimiz müteveffâ-i mezbûrun ile’l-vefât yedinde mülk ve hakkı olup ba‘de vefâtihi bizimle müvekkile-i mezbûreye mevrûs olmağın âlât-ı gedik-i mezkûru tarefeynden bi’l-icâb ve’l-kabûl müvekkile-i mezbûre Hatice Hatun’a dört yüz guruşa bi’l-asâle ve bi’l-vekâle bey‘ ve temlîk ve teslîm eylediğimizde ol dahi iştirâ ve kabz ve kabûl eylediğinden sonra semeni olan meblağ-ı mezkûr dört yüz guruşu bize def‘ ve teslîm biz dahi yedinden tamamen ve kâmilen bi’l-asâle ve bi’l-vekâle ahz u kabz eylediğimizden sonra mebî‘-i mezkûrun tağrîr ve gabnine müte‘allika âmme-i da‘vâdan tarefeynden her birimiz âharın zimmetini kabûlü hâvi bi’l-asâle ve bi’l-vekâle ibrâ ve iskāt eyledik fîmâ ba‘d âlât-ı gedik-i mezkûrda bizim aslan ve kat‘an alâka ve medhalimiz kalmayıp müşteriye-i mezbûre Hatice Hatun’un mülk-i müşterâsı ve hakk-ı sırfı olmuşdur deyü takrîrlerini vekîl-i merkūm es-Seyyid Ahmed Efendi ba‘de’t-tasdîk mezbûr Ali yine meclis-i şer‘de i‘âde-i kelâm edip eğer müvekkilem kız karındaşım mezbûre Âişe ba‘de zamânin zuhûr ve beni tevkîlini inkâr edip âlât-ı gedik-i mezkûrdan hissesini müvekkile-i mezbûreden da‘vâ ve şer‘an bir nesne ahz eder ise mikdâr-ı mehûzuna ben kefîl ve zâminim dedikde vekîl dahi kefâletini kabûl eylediği İslâmbol Mahkemesi’nden huzûr-ı âlîlerine i‘lâm olundu. Fî-25 min-Şevvâli’l-mükerrem sene [1]216