İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 128 Hüküm no: 97 Orijinal metin no: [12b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed’in, Seyyid Mehmed Said’e borcunu ödeyeceğini taahhüt etmesi Ma‘rûz Duhân tüccârından es-Seyyid Mehmed Said b. el-Hâc Süleyman meclis-i şer‘-i münîrde el-Hâc Mehmed mahzarında târih-i i‘lâmdan on yedi <> ay mukaddem malımdan mezbûr el-Hâc Mehmed’e mecmû‘u dört bin dört yüz altmış altı guruş kıymetli Hamid bezi ve Haleb çatârisi ve kutnî ve kilim ve taban inciri ve cârub ve yorgan verip eşyâ-i mezkûreyi Anapa kazâsına götürüp âhara bey‘ ve makbûzundan ancak benim için iki re’s câriye iştirâ ve mâ‘adâsıyla bal mumu ve revgan-ı sâde iştirâ ve bana irsâl ben dahi âhara bey‘ ve bu vechile ticâret ve hâsıl olan fâide beynimizde munâsafa olmak üzere mukāvele etmişdik. El-hâletü hâzihi mezbûr el-Hâc Mehmed eşyâ-yı mezkûreyi kazâ-i mezbûrede bey‘ ve mecmû‘-ı semenleriyle emrimin hilâfı cevârî iştirâ etmekle re’s-i malım olan meblağ-ı mezkûr dört bin dört yüz altmış guruş ile cihet-i deyn-i şer‘îden dahi iki yüz yetmiş beş guruş ki cem‘an dört bin yedi yüz kırk bir guruşun bin kırk yedi guruşunu bana edâ ve teslîm bâkī üç bin üç yüz doksan bir guruşu taleb ederim deyü da‘vâ ettikde, merkūm el-Hâc Mehmed ber-vech-i muharrer ol mikdâr kıymetli eşyâ kabzını ve eşyâ-yı mezkûreyi âhara bey‘ ve ba‘de ihrâci’l-mesârif dört bin yüz altmış üç guruş makbûzu olup meblağ-ı mezkûr ile cihet-i deyn-i şer‘îden iki yüz yetmiş beş guruş ki cem‘an dört bin dört yüz otuz sekiz guruşdan bâkī üç bin üç yüz doksan bir guruş deyni olduğunu ikrâr u i‘tirâf etmeğin mûcebince meblağ-ı bâkī-i mezkûr üç bin üç yüz doksan bir guruşun edâsıyla merkūm el-Hâc Mehmed ba‘de’l-ilzâm mezbûr el-Hâc Mehmed yedinde rıkka münkāde iki re’s Çerkes câriyesini merkūm es-Seyyid Mehmed Said’e üç bin guruşa bey‘ ve temlîk ve teslîm ol dahi iştirâ ve kabz u kabûl eyledikden sonra semen-i meblağ-ı mezkûr üç bin guruşu deyni olan meblağ-ı mezkûrun ol mikdârına takās ve mahsûb eyledikde ol dahi mukāssa ve kabûl edip bâkī üç yüz doksan bir guruşu müdde‘î-i mezbûr es-Seyyid Mehmed Said’e edâ ve teslîme mezbûr el-Hâc Mehmed ta‘ahhüd eylediği İstanbul Mahkemesi’nden huzûr-ı âlîlerine i‘lâm olundu. Fî-22 min-Şevvâli’l-mükerrem sene [1]216