İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 132 Hüküm no: 103 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu esnafından Hüseyin Ağa, Mehmed Ağa, Tiryâkîoğlu Mustafa Ağa ve diğer esnafın, Sabuncu Seyyid Hasan’daki alacaklarının hacz yoluyla alınmasını talep etmeleri Ma‘rûz Sâdır olan fermân-ı âlîlerine imtisâlen zikri âtî husûsun ber-nehc-i şer‘î tanzîmine şürû‘ ve Âsitâne-i aliyyeye Girid cezîresinden sabun celb ve ibâdullâha bey‘ eden tüccârdan ashâb-ı arzuhâl han ağası demekle ma‘rûf Hüseyin Ağa ve damadı Mehmed Ağa ve Tiryâkîoğlu Mustafa Ağa ve Suhtezâde İbrahim ve Çavuşoğlu Molla Mehmed ve Kuklakî Mustafa Ağa ve Tarakçıoğlu Derviş Ağa ve Mehmet Ali ve Kamaryalı Hacı Ali Ağa ve Yeğenzâde el-Hâc Mehmet Ağa ve Topçu Hasan Ağa ve Yeğenoğlu Molla Mehmed ve İmâmoğlu Molla Derviş Ali ve Mücellid Mehmed Emin Ağa ve Romalı Molla Mehmed nâm kimesnelerin İslâmbol’da Zindânkapısı hâricinde sabuncu es-Seyyid Hasan zimmetinde her birinin ber-mûceb-i defter-i müfredât otuz iki bin kırk yedi guruş otuz üç para alacakları olduğu lede’l-murâfa‘a mezbûr es-Seyyid Hasan’ın ikrârıyla zâhir ve mûcebiyle ba‘de’l-hükm meblağ-ı mezkûrdan ancak han ağası Hüseyin Ağa’ya dokuz yüz yirmi guruş teslîm etmekle deyn-i bâkīsi için mezbûr es-Seyyid Hasan ve Katırhanı kurbünde sabuncu Halil’in üç bin yüz on guruş deyni olduğu ikrârıyla zâhir olmağla deyn-i mezkûr için mezbûr Halil ve Ayazmakapısında Emir Hasan zimmetinde sekiz bin sekiz yüz otuz dokuz guruş beş para ve Rüstempaşa Câmi‘-i şerîfi kurbünde es-Seyyid İsmail zimmetinde iki bin altı yüz kırk beş guruş otuz sekiz para ve taşçılar başında Yenihanda Ciridoğlu es-Seyyid Mehmed’e bin sekiz yüz kırk dokuz guruş yirmi üç para ve Tahtakale’de Emir Mustafa zimmetinde dört bin yüz altmış dört guruş dört para ve Dîvânyolu’nda Mehmed Emin zimmetinde üç bin beş yüz seksen sekiz guruş beş para alacakları olduğu merkūmûnun ikrârlarıyla sâbit ve Alacahamam’da Karakaş zimmîden alacakları olan yedi bin yirmi üç guruş yirmi üç paranın edâsında mümâtale ve ashâb-ı azîm talebleriyle merkūmun habse ilkā ve bunlardan mâ‘adâ sâir ehl-i İslâm deynlerini i‘tirâf ve her biri altmış bir güne değin istimhâl etmeleriyle tüccâr-ı merkūmun dahi imhâl ve edâya kefîlleri ahz olunup ve re‘âyâdan on dört nefer mazbûtü’l-esâmî zimmîler dahi birbirlerine kefîl olmalarıyla altmış bir güne değin edâya ta‘ahhüd ve küllîsini edâ edip bir mikdâr deynleri bâkī kalıb lâkin mahbûs olan merkūmûna deynlerini edâ için yedlerinde olan emti‘a ve mülkleri olan dekâkîn gediklerini bey‘ ve edâ-yı deyn ediniz deyü bi’d-defa‘at tenbîh ve tazyîk olunup onlar dahi inâden bey‘ etmemeleriyle verilen fetâvâ-yı şerîfe mûcebince merkūmûnun emti‘a ve gedik âlâtları vefâ etmez ise akarlarının semen-i misilleriyle ma‘rifet-i şer‘le bey‘ iktizâ etmekle merkūmûn ile sâir edâda mümâtalesi zuhûr edenlerin emti‘a ve gedik âlâtları vefâ etmez ise akarlarının bey‘ olunması için emr-i âlîleri sudûru iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-27 min-Şevvâl sene [1]216