İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 133 Hüküm no: 104 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe b. Mehmed’in, İsmail b. Abdullah’a sattığı gedik aletlerini teslimine tenbih Ma‘rûz İsmail Efendi b. Abdullah meclis-i şer‘-i münîrde Halil Beşe b. Mehmed mahzarında mezbûr Halil Beşe işbu yedimde olup sene-i sâbıkā Rebî‘ülâhirinin on birinci günü târihiyle müverraha ol târihde Ahi Çelebi Mahkemesi nâibi olan müderrisîn-i kirâmdan es-Seyyid Mehmed Şemseddin Efendi’nin imzâ ve hatmini havîye bir kıt‘a mübâya‘a hücceti nâtıka olduğu üzere İslâmbol’da Ayazmakapısı hâricinde vâki‘ bir bâb pekmezci dükkânı derûnunda mevcûde beyne’l-esnâf gedik tâ‘bir olunur on fıçı ve bir kantar ve bir minder ve dört iskemle ve bir akçe tahtası bin otuz üç guruş semen-i makbûza bana bey‘ ve teslîm ben dahi iştirâ ve kabz eylediğimden sonra mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini kabûlü hâvi ibrâ ve iskāt etmişdik el-hâletü hâzihi âlât-ı gedik-i mezkûru mezbûr Halil Beşe fuzûlî zabt etmekle suâl olunup âlât-ı mezkûreden keff-i yed ve bana teslîme mezbûr Halil Beşe’ye tenbîh olunması murâdımdır deyü takrîrine mutâbık bir kıt‘a hüccet-i şer‘iyye ibrâzıyla da‘vâ ettikde ol dahi cevâbında müdde‘î-i merkūmun ber-vech-i muharrer müdde‘âsını ikrâr u i‘tirâf etmeğin mûcebince âlât-ı gedik-i mezkûru müdde‘î-i merkūm İsmail Efendi’ye teslîme mezbûr Halil Beşe’ye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-25 min-Şevvâl sene [1]216