İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 134 Hüküm no: 105 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruhariye bt. Dimitri ile Ahmed Ağa b. Hüseyin Ağa’nın menzil davasından iki yüz guruşla sulh oldukları 200 guruş hüküm Ma‘rûz Mu‘arrefetü’ş-şahs Ruharina bt. Dimitri nâm Nasrâniyenin arzuhâl eden sadrı kebîr oğlu Nikola v. Yorgi nâm zimmî hâzır olduğu hâlde derûn-ı arzuhâlde mezkûrü’l-ism Ahmed Ağa b. Hüseyin mahzarında ben bundan akdem mezbûr Ahmed Ağa’yı Bahr-ı Sefîd’de Yunda Adası’nda vâki‘ ma‘lûmü’l-hudûd ve’l-müştemilât bir bâb mülk menzilimi semen-i misliyle âhara bey‘e tarafımdan bâ-hüccet-i şer‘iyye vekîl eylediğimde ol dahi kabûl ve menzil-i mezkûru mahallinde iki yüz guruşa âhara bey‘ ve kabz-ı semen etmekle meblağ-ı mezbûr ile damadım Manol zimmî malımdan fuzûlî ahz eylediği mecmû‘u üç yüz on dokuz guruş kıymetli yün memlû dört minder ve yün memlû sekiz yastık ve üç işleme peşkir ve iki çârşeb ve iki kilim ve iki ceviz sandık ve bir tahta sandık ve on sahan ve bir fistan ve bir Şam alacası anteri ve bir sini ve bir yorgan ve bir tâbe ve bir kebîr tencere ve bir Frenî iskemlemi gāib-i mesfûrdan tahsîl için bâ-emr-i âlî mezbûr Ahmed Ağa’yı mübâşir ta‘yîn ve eşyâ-i muharrere-i mezkûreyi kabza oğlum hâzır-ı mesfûru tevkîl etmişdim lâkin merkūm Ahmed Ağa eşyâ-i muharrere-i mezkûreyi gāib-i mesfûrdan tahsîl ve kabz etmekle eşyâ-i muharrere-i mezkûre mevcûde ise a‘yânını, müstehlike ise ba‘de’s-sübût kıymet-i şer‘iyyelerini talep ederim deyü da‘vâ eylediğimde ol dahi menzil semeninden iki yüz guruş ile eşyâ-i mezkûre kabzını ikrâr lâkin eşyâ-i mezkûreyi ba‘de’t-tahsîl oğlun hâzır-ı mersûma teslîm etmişdim deyü beni def‘inden mâ‘adâ iki ay sa‘y etmekle sebk eden ecr-i mislimi taleb ederim deyü benden da‘vâ ve beynimizde ba‘de vukū‘ı’l-münâza‘a bâ-tavassut-ı muslihîn merkūm Ahmed Ağa meblağ-ı mezkûr iki yüz guruşu bana teslîme ta‘ahhüd eylediğinde ben dahi eşyâ-i muharrere-i mezkûre da‘vâsından ben ve merkūm Ahmed Ağa dahi ücret-i mübâşiriye da‘vâsından her birimiz fâriğler olup meblağ-ı mezkûr iki yüz guruşdan mâ‘adâ bi’l-cümle zikr olunan husûslara müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan istisnâ olunan meblağ-ı mezkûr iki yüz guruşu müdde‘iye-i mezbûre Ruharina Nasrâniyeye def‘ ve teslîme mezbûr Ahmed Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-18 min-L sene [1]216