İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 135 Hüküm no: 106 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaşya bt. Yani ile Estambol v. Yorgi’nin gedik eletleri davasında yüz otuz guruşla sulh oldukları 130 guruşa sulh Ma‘rûz Medîne-i Üsküdar’a muzâfe Yoros nahiyesine tâbi‘ Arnavud karyesi mütemekkinelerinden arzuhâl eden Anaştaşya bt. Yani v. Yorgi nâm Nasrâniye tarafından husûs-ı âtî’l-beyânda vekîl olduğu şahsını ârifân Haseki Ahmed Ağa b. İsmail ile Yiğitbaşı İstemad v. Yani zimmî şehâdetleriyle sâbit olan Marko v. Vasil zimmî meclis-i şer‘-i münîrde zikri âtî gedik âlâtına vâzı‘u’l-yed olan Estambul v. Yorgi ve Nikola v. Ananuşti nâm zimmîler muvâcehelerinde nâhiye-i mezbûreye tâbi‘ Anadoluhisarı kurbünde Göksu nâm mahalde vâki‘ Gölcük Bostanı demekle ma‘rûf bir bâb bostan derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme seksen sehm i‘tibârıyla müvekkilem mersûme mâlike olduğu iki sehm hissesini bundan akdem mersûmân Estambul ve Nikola zimmîlere yüz doksan yedi guruş semen-i makbûza bey‘ ve teslîm edip lâkin bey‘-i mezkûr tağrîr ve gabnine fâhiş ile olmuşdu deyü bu esnâda da‘vâya tasaddî eylediğinde onlar dahi tağrîr ve gabn müdde‘âsını inkâr etmeleriyle beynlerinde ba‘de vukū‘ı’l-münâza‘a bâ-tavassut-ı muslihîn müvekkilem mersûme ber-vech-i muharrer tasaddî eylediği da‘vâsından mersûmân ile kat‘an li’n-nizâ‘ yüz otuz guruş bedel-i makbûza sulh olup âlât-ı gedik-i mezkûra ve icâresine ve bi’l-cümle husûs-ı mezkûra müte‘allika âmme-i de‘âvî ve kâffe-i mütâlebâtdan mersûmân Estambul ve Nikola zimmîlerin zimmetlerini kabûllerini hâvi ibrâ ve iskāt eyledi deyü vekîl-i mesfûrun takrîr-i meşrûhunu mersûmân Estambul ve Nikola zimmîler tasdîk ve bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-27 min-Şevvâl sene [1]216