İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 135 Hüküm no: 107 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali bin Abdullah’ın vârisi Hatice Hatun’un, Halil bin Mustafa ile sulh oldukları Dem-i diyetden sulh ibrâ Ma‘rûz Fi’l-asl Anadolu’da Nevşehir kazâsı ahâlîsinden olup Havâss-ı Refî‘a kazâsına muzâfe Çekmece-i sagīr nahiyesine tâbi‘ Filorya karyesinde mütemekkin iken sekiz ay mukaddem vefât eden Ali b. Abdullah’ın verâseti zevce-i metrûkesi Hatice ile babası mezbûr Abdullah’a ve zevce-i uhrâsından mütevellîd sulbî sagīr oğlu Ali’ye ba‘de’l-inhisâr zâtı mu‘arrefe zevce-i mezbûre Hatice Hatun meclis-i şer‘-i münîrde karye-i mezbûre ahâlîsinden Halil b. Mustafa mahzarında zevcim ve mûrisim müteveffâ-i merkūm işbu târih-i i‘lâm senesi Saferi’l-hayrının selhi günü kendi tarlasında hâsıl alef demetlerini karye-i mezbûreye nakle kendiye mu‘în olmak için mezbûr Halil’i yanına terfīk etmekle zikr olunan alef demetlerini arabaya tahmîl edip bağlamak için üzerine ilkā eyledikleri urganın bir başından zevcim müteveffâ-i mezbûr ve bir başından mezbûr Halil tutup çekerler iken mezbûr Halil kendi tarafında olan ipi salıvermekle te‘addî ve taksirinden nâşî zevcim mezbûr arabadan düşüp alnı yarılıp ve a‘zası kara bere olup iki gün mürûrunda müteessiren fevt olmağla mûceb-i şer‘îsini bi’l-asâle ve bi’l-verâse taleb ederim deyü da‘vâ sadedinde olduğumda ol dahi ber-vech-i muharrer te‘addîsini inkâr etmekle beynimizde ba‘de vukū‘ı’l-münâza‘a bâ-tavassut-ı muslihîn ben tasaddî eylediğim da‘vâ-yı mezkûremden mezbûr Halil ile on beş guruşa sulh olduğumda ol dahi sulh-ı mezkûru ba‘de’l-kabûl bedel-i sulhden mâ‘adâ zevcim müteveffâ-i mezbûrun dem ü diyetine müte‘allika âmme-i da‘vâdan mezbûr Halil’in zimmetini kabûlü hâvi ibrâ ve iskāt eyledim deyü ikrâr ve tasdîkleri tescîl ve İslâmbol Mahkemesi’nden huzûr-ı âlîlerine i‘lâm olundu. Fî-27 min-Şevvâl sene [1]216