İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 136 Hüküm no: 108 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Usta b. Hüseyin ve Seyyid Mehmed Usta’nın simitçi dükkanında yağlı börek, çörek yapmasına engel olunmaması gerektiği Yağlı işlemesine müdâhale etmemelerine tenbîh Ma‘rûz Ashâb-ı arzuhâl Çörekçiler Kethüdâsı Ahmed Ağa ve sâbıkā kethüdâ olan es-Seyyid Mustafa ve ustalarından el-Hâc Hüseyin ve el-Hâc İbrahim ve Mustafa ve el-Hâc Mehmed ve el-Hâc Hasan ve Osman ve diğer Mehmed ve Hüseyin ve İbrahim ve Ali ve diğer Osman ve âhar Hasan ve Uzun Ahmed vesâirleri meclis-i şer‘-i münîrde İslâmbol’da Küçükhamam ittisâlinde vâki‘ bir bâb dükkânın müstecirleri ve derûnlarında olan gedik âlâtının dört sehm i‘tibâriyle iki sehminin mutasarrıfı Ahmed Usta b. Hüseyin ve bir rub‘una mutasarrıf es-Seyyid Mehmed ve rub‘-ı âharına mutasarrıfe zâtı mu‘arrefe Şerife Âişe bt. el-Hâc Hüseyin mahzarlarında merkūmûn Ahmed Usta ve es-Seyyid Mehmed selâse-i erbâ‘ına mutasarrıf oldukları dükkân simitçi dükkânı olup simid işlemeye kanâ‘at etmeyip yağlı çörek ve börek ve kâhî işlemeleriyle bu misillü yağlı işlemek bize mahsûs olduğuna binâen fîmâ ba‘d simitden mâ‘adâ yağlı işlememek üzere mezbûrâna tenbîh olunması murâdımızdır dediklerinde esnâf-ı merkūmânın şürût-ı nizâmları derkenâra havâle olundukda ekmekçi esnâfı başka ve simitçi ve çörekçi başka esnâf olmak üzere baş muhâsebede mukayyed olup simitçi esnâfı yağlı tabh etmek ve etmemek için nizâmları kaydı bulunmadığı başmuhâsebe derkenârı nâtık olduğundan başka kimesneyi bilâ-mûceb kisb ve ticâretten men‘ ile hasr-ı bey‘ u şirâ gayr-ı meşrû‘ ve mukaddemâ şerefrîz-i sudûr olan hatt-ı hümâyûn-ı adâlet-makrûn ile merfû‘ olmağla merkūmân Ahmed Usta ve es-Seyyid Mehmed Usta keyfe mâ yeşâ envâ‘ yağlı tabh ve bey‘lerine müdâhale etmemek üzere esnâf-ı merkūmûna şer‘an tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-25 min-Şevvâli’l-mükerrem sene 1216