İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 138 Hüküm no: 111 Orijinal metin no: [14b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çavuş bin Ahmed’in boşandığı eşi Hatice bt. Mehmed’e nafakasını ve mehr-i müeccelini ödemesi gerektiği Ma‘rûz Mu‘arrefetü’z-zât Hatice bt. Mehmed Said nâm hatun meclis-i şer‘-i münîrde dîvân-ı âlî çavuşlarından sâbıkā zevci Ali Çavuş b. Ahmed mahzarında merkūm Ali Çavuş zevc-i dâhilim olup târih-i i‘lâmdan yedi gün mukaddem beni tatlîk etmekle zimmetinde mütekarrir ve ma‘kūdün-aleyh olan yüz elli guruş mehr-i müeccelim ile nafaka-i iddet-i bâkīyemi zevcim mezbûrdan taleb ederim deyü da‘vâ ettikde ol dahi cevâbında müdde‘iye-i mezbûre ol mikdâr mehir tesmiyesiyle zevce-i medhûlun bihâsı olduğunu tatlîkini ikrâr lâkin zevcem mezbûre mehr-i mezkûrunun yüz guruşunu zevciyet beynimizde kāime iken bana hibe etmişdi deyü ol mikdârında ba‘de’d-def‘ ve’l-inkâr dâfi‘-i mezbûr ber-vech-i muharrer def‘-i mezkûrunu isbâtdan ızhâr-ı acz ve istihlâf ettikde talebiyle bi’l-muvâcehe müdde‘iye-i mezbûre Hatice Hatun’a ber-nehc-i şer‘î yemîn verilmeğin mûcebiyle dâfi‘-i merkūm Ali Çavuş def‘-i mezkûruyla bilâ-beyyine mu‘ârazadan ba‘de’l-men‘ mezbûr Ali Çavuş’un ikrâr u i‘tirâfı mûcebince mehr-i mezkûr yüz elli guruşu hâlâ ve nafaka-i iddet-i bâkīyesini vakt-i istihkākta müdde‘iye-i mezbûre Hatice Hatun’a edâ ve teslîme mezbûr Ali Çavuş’a tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-28 min -L sene [1]216