İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 139 Hüküm no: 112 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alile Esma bt. Abdullah’ın, eşi Molla Ahmed b. Mehmed’e kendisini bakmak şartıyla verdiği mallarını geri alması Semen-i eşyâ-i müstehlike 897 guruş ile 499 guruşun edâsına tenbîh Ma‘rûz Sâhibe-i arzuhâl mu‘arrefetü’z-zât alile Hâce Esma bt. Abdullah meclis-i şer‘-i münîrde zikri âtî menzile vâzı‘u’l-yed olan arzuhâlde mezkûr hâlâ zevci Molla Ahmed b. Mehmed mahzarında İslâmbol’da Abdi Subaşı Mahallesi’nde vâki‘ bir tarafdan Kehhâlbaşı Medresesi ve bir tarafdan Başkâtib efendi arsası ve tarefeyni tarîk-i âm ile mahdûd bir bâb mülk menzilimi ölünce bana bakmak şartıyla zevcim mezbûr Molla Ahmed’e dört bin guruşa bey‘ ve semeninden zimmetini ibrâ etmişdim lâkin şart-ı mezkûr ile olan beyin fesâdına binâen menzil-i mezkûru istirdâd ve malımdan fuzûlî ahz eylediği bir Mushaf-ı şerîf ile imâm meşrûtası olarak bir bâb vakıf menzil temessükü ile dört yüz elli guruş kıymetli elmaslı bir gerdâniye ve dört yüz guruş kıymetli incili bir altın bilezik ve iki yüz elli guruş kıymetli elmaslı bir zümrüd küpe ve doksan guruş kıymetli bir elmaslı altın yüzük ve yetmiş guruş kıymetli iki zümrüd yüzük ve yetmiş beş guruş kıymetli iki yüz elli vakıyye yün ve elli guruş kıymetli bir penbe tûsi şal ve seksen guruş kıymetli iki top çiçekli sevayı ve kırk guruş kıymetli bir kaliçe seccâde ve yüz elli guruş kıymetli dört eski maden tabak ve kırk guruş kıymetli hindkârî bir zar ve beş yüz guruş kıymetli elmaslı bir altın kuşak ve seksen guruş kıymetli iki top Trabzon bezi ve iki yüz guruş kıymetli bir kutu içinde ma‘lûmü’l-mikdâr eski maden fincan ve elli guruş kıymetli bir altın oluk anteri mevcûde ise ayânını müstehlike ise ba‘de’s-sübût kıymet-i mezkûrelerini ve yedimden iktirâz ve kabz eylediği dört yüz doksan dokuz guruşu zevcim mezbûrdan taleb ederim deyü da‘vâ eyledikde ol dahi cevâbında müdde‘iye-i mezbûreden dört yüz doksan dokuz guruş iktirâz ve kabzını ve malı olan bir Mushaf ile menzil temessükünü ahzını ve hâlâ aynları yedinde mevcûde olduğunu ve yine müdde‘iye-i mezbûrenin malı olarak zikr olunan elmaslı bir gerdâniye ve incili altın bilezik ve elmaslı zümrüd küpe ve elmaslı iki altın yüzük ve iki zümrüd yüzük ve iki yüz elli vakıyye yün ve bir penbe tûsi şal ve bir top çiçekli sevâyı ve bir [ka]liçe seccâde ve bir hindkâri zarı zevcem mezbûre bana verip eşyâ-yı mezkûreyi semen-i misilleriyle âhara bey‘ ve semenlerini zevcem mezbûre ile iştirâken mutasarrıf olduğumuz vakf menzil binâsına harc ve sarf eyle deyü bana emr etmekle ben dahi zikr olunan elmaslı gerdâniyeyi üç yüz doksan guruşa ve incili altın bilezik ile bir elmaslı altın yüzüğü iki yüz guruşa ve elmaslı zümrüd küpe ile ile zümrüd yüzüğün birini yüz otuz guruşa ve diğer zümrüd yüzüğü yirmi beş guruşa ve iki yüz elli vakıyye yünü yetmiş beş guruşa ve penbe tûsi şalı yirmi guruşa ve bir aded çiçekli sevâyıyı yirmi guruşa ve bir kaliçe seccâdeyi on beş guruşa ve bir Hindkâri zarı yirmi iki guruşa bey‘ ve semenleri olan cem‘an sekiz yüz doksan yedi guruşu kabz ve emriyle menzil-i mezkûr binâsına harc ve sarf etmişdim deyip müdde‘iye-i mezbûrenin şart-ı müdde‘âsıyla bir çift elmaslı altın kuşak ve altın oluk bir anteri ve bir top çiçekli sevâyı ve eski maden fincan ve iki top Trabzon bezi ve dört eski maden tabak müdde‘âlarıyla kabzını mu‘terif olduğu eşyâların ziyâde kıymet müdde‘âlarını inkârından mâ‘adâ zevcem mezbûre bana karz verdiği dört yüz doksan dokuz guruşu bana hibe etmişdi deyü eylediği def‘lerini mezbûre Hâce Esma Kadın inkâr etmekle tarefeyn beyâna ba‘de’l-havâle mezbûre Hâce Esma Kadın ber-vech-i muharrer şart-ı müdde‘âsını lede’t-tezkiye şehâdetleri makbûle olan mahalle-i mezbûre İmâmı Mahmud Efendi b. İbrahim ve Askeri Reisi Hâfız Abdullah Efendi b. Halil şehâdetleriyle ba‘de’l-isbât mezbûre Hâce Esma Kadın ziyâde eşyâ ve kıymet müdde‘âlarını ve mezbûr Molla Ahmed ber-vech-i muharrer deflerini her biri isbâtdan ızhâr-ı acz ve istihlâf etmeleriyle mezbûre Hâce Esma Kadın ve mezbûr Molla Ahmed’den herbirine ber-nehc-i şer‘î yemîn verilmeğin mûcebiyle mezbûre Hâce Esma Kadın ziyâde eşyâ ve kıymet müdde‘âsıyla mezbûr Molla Ahmed def‘-i mezkûrlarıyla herbiri âhara bilâ-beyyine mu‘ârazadan ba‘de’l-men‘ mûceblerince zikr olunan Mushaf-ı şerîf ve vakıf menzil temessükü ve mülk menzil ve meblağ-ı mezkûr dört yüz doksan dokuz guruş ile eşyâ-i müstehlike semenleri olan sekiz yüz doksan yedi guruşu müdde‘iye-i mezbûre Hâce Esma Kadın’a red ve teslîme mezbûr Molla Ahmed’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-25 min-Şevvâl sene 1216