İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 140 Hüküm no: 113 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Ali b. Mustafa’nın, Tüccardan Abdullah ve İbrahim bin Mehmed’e olan borcunu ödemesi gerektiği 1.070 guruş 16 para ikrâr-ı deyn Ma‘rûz Tüccârdan Abdullah b. Abdurrahman ve şerîki İbrahim b. Mehmed meclis-i şer‘-i münîrde Ayasofya-i kebîr kurbünde Şerbetçi Ali b. Mustafa mahzarında merkūm Ali zimmetinde mal-ı şirketimizden olmak üzere yedimizden iştirâ ve kabz eylediği ma‘lûmü’l-kıyye şeker semeninden bâkī bin yetmiş guruş on altı para alacağı olmağla hâlâ taleb ederiz deyü da‘vâ ettiklerinde ol dahi cevâbında müdde‘iyân-ı mezbûrânın ber-vech-i muharrer müdde‘âlarını ve meblağ-ı bâkī-i mezkûr el-yevm zimmetinde deyni olduğunu ikrâr u i‘tirâf etmeğin mûcebiyle meblağ-ı bâkī-i mezkûr bin yetmiş guruş on altı paranın müdde‘iyân-ı mezbûrâna edâsıyla mezbûr Ali ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-gurre-i Zilka‘de sene 1216