İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 141 Hüküm no: 114 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ankara’da sof ve şal imal edip İstanbul’da satan esnafın nizama uymaları gerektiği Sofcu esnâfına dâir Ma‘rûz Ashâb-ı arzuhâl Ankara kazâsında sof ve şalı nesc ve i‘mâl ettirip Âsitâne-i aliyye’ye nakl ve bey‘ eder Sofcu esnâfı meclis-i şer‘-i şerîfde kazâ-i merkūmda muhtârları olan kassâr tâifesinden Uzunoğlu Karabet ve Tokatlıoğlu Oseb zimmîler hâzır oldukları hâlde kazâ-i mezbûr ahâlîsinden olup bu def‘a kassârlık nizâmına dâir bir kıt‘a i‘lâm ile vârid olan Eyedoğlu Karabet ve Ferağoğlu Acı Kigork nâm zimmîler muvâcehelerinde ez kadîm kazâ-i mezbûrda nesc ve i‘mâl ettirdiğimiz sof ve şalının beher topunu kassâr tâifesi kırkar akçeye kassârlar iken yevmen fe-yevmen ücretlerini ziyâde ederek üç nev‘ i‘tibâriyle yirmi beş ve otuz ve otuz beş paraya terakkī eylediğinden mâ‘adâ kumaşlarımızı layıkıyla kassâr etmeyip ifsâd ettiklerine binâen bizler dahi beher topunu yirmi ikişer paraya kassârlar âhar kassârlar tedârik edip emti‘amızı matlûbumuz üzere kassârlayıp cümlemiz herbirinden râzı ve müteşekkirler iken mersûmûn atîk kassârlar kassârlığı beynlerinde kırk nefere hasr ve tahsis ve emti‘amızı üç nev‘ i‘tibâr ve her nev‘in fiyatına üçer para zamla bizim muhtarımız olan kassârların tardı ile fîmâ ba‘d kassârlık ancak kendilere münhasır olup hilâfı hareket edenlerden îrad-ı cedîd hümâyûn hazinesine altı bin guruş nezr olmak ve işbu nizâm düstûrü’l-amel olmak üzere fermân-ı âlî ısdârı istid‘âlarını hâvi hâlâ kazâ-i mezbûr nâibi Moravîzâde Hâmid Efendi’yi itmâ-birle gıyabımızdan aldıkları bir kıt‘a i‘lâmı sened ittihâz edip hâlâ Ankara’da muhtarımız olan kassârları kassârlıktan men‘ ve mersûmân Eyedoğlu Karabet ve Ferağoğlu Acı Kigork i‘lâm-ı merkūm mûcebince fermân-ı âlî ısdârı sâiyesinde olmalarıyla mes’ullerine müsa‘ade-i aliyye buyrulmayıp ve hâlâ Ankara’da muhtârımız olan kassârlara vâki‘ olan müdâhaleleri men‘ ü def‘ buyrulmağı istid‘â ve istirhâm ve muhtârları olan kassârlardan hâzır bi’l-meclis Uzunoğlu Karabet ve Tokatlıoğlu Oseb zimmîlerden dahi suâl olundukda fi’l-hakīka şimdilik sof ve şalının beher topunu yirmi ikişer paraya gāyet a‘lâ olmak üzere esnâf-ı merkūmenin matlûbları vechile kassârladıklarını i‘tirâf ve bundan böyle bi-mennihî te‘âlâ ücret-i kassâriyesini tenzîle dahi ta‘ahhüd ederler bu sûretde bundan akdem men‘-i inhisâr-ı bey‘ u şirâ bâbında şerefrîz-i sudûr olan hatt-ı hümâyûn-ı adâlet-makrûn mûcebince nâib-i merkūmun tama‘-ı hâme teb‘an verdiği arz-ı garaz-âmizine ve müdde‘ûn-ı mersûmûnun da‘vâ-yı bâtıllarına şer‘an i‘tibâr ve iltifât olunmayıp husûs-ı mezkûr îcâr ve istîcâr makūlesinden olup mûcirin rızâsı yok iken müstecir ben i‘mâl ederim deyü cebr ve ibrâmı hilâf-ı şer‘-i şerîf ve mugāyir-i mazmûn-ı hatt-ı hümâyûn-ı adâlet-redîf olmağla nâib-i merkūmun arzına adem-i i‘tibâr-birle esnâf-ı merkūmenin rızâlarıyla istihdâm ve istîcâr eyledikleri kassârlara müdâhale ve ta‘arruzları bi’l-külliye men‘ olunup murâd ve ihtiyâr eyledikleri<> kimesnelere ale’l-ıtlâk ücret-i kalîle ile i‘mâl ettirmeleri şer‘-i şerîfe mutâbık ve hatt-ı hümâyûn mazmûn-ı münîfine muvâfık ve ibâdullâha enfa‘ ve evlâ olmağla ol vechile esnâf-ı merkūme yedlerine sened olmak üzere tuğra-yı garrâ ile mu‘anven fermân-ı âlîşân ısdâr ve ihsân buyrulup i‘lâm-ı hâli hâvi Ankara nâibine ve damga eminine hitâben başka emr-i âlî ısdârı iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-4 Za sene [1]216