İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 142 Hüküm no: 115 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci Mehmed b. Abdullah’ın hürriyet davasını ispat edemediği ve efendisi Molla Ali’ye itâate tenbih Rıkka inkıyâdına tenbîh Ma‘rûz Sâbıkā rıkka inkıyâdını mukır ve mu‘terif olmağla ber-vech-i âtî da‘vâya kıbel-i şer‘den me’zûn olan Zenci Mehmed b. Abdullah meclis-i şer‘-i münîrde rakīk gulâmı olmak üzere kendiye vaz‘-ı yedi mütehakkık olan Molla Ali b. Abdullah mahzarında ben bundan akdem Edremid kasabası ahâlîsinden Bakkāl İsmail Efendi nâm kimesnenin yedinde rıkka münkād gulâmı olmamla mevlâm mezbûr târih-i i‘lâmdan üç sene mukaddem malından beni tahrîr ve i‘tâk edip bu vechile ben hür olmuşken mezbûr Molla Ali rakīk gulâmı olmak üzere bi-gayr-ı hakkın bana vaz‘-ı yed eder suâl olunup kasr-ı yedine tenbîh ve sebîlim tahliyye olunmak murâdımdır deyü da‘vâ ettikde ol dahi cevâbında müdde‘î-i mevsûf-ı mezbûr mevlâsı merkūm İsmail Efendi’nin bey‘e vekîli olan hâzır bi’l-meclis Mustafa işbu Ahmed odabaşıya Çukadâr Mehmed Ağa’ya ba‘de’l-bey‘ ve’t-teslîm ben dahi mezbûr Çukadâr Mehmed’den iki yüz on guruş semen-i medfû‘ ve makbûza iştirâ ve kabz etmişdirm deyü vaz‘-ı yedini ikrâr ve ber-vech-i muharrer hürriyet müdde‘âsını inkâr etmekle müdde‘î-i mevsûf-ı mezbûr ber-vech-i muharrer hürriyet müdde‘âsını isbâta kādir ve tahlîfe dahi tâlib olmamağla mûcebince müdde‘î-i mevsûf-ı mezbûr da‘vâ-yı mezkûresiyle bilâ-beyyine mu‘ârazadan ba‘de’l-men‘ ikrâr u i‘tirâfı mûcebiyle mevlâsı mezbûr Molla Ali’ye kemâ-fi’s-sâbık rıkka inkıyâdına mezbûr Mehmed’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-2 min-Zilka‘de sene [1]216