İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 143 Hüküm no: 116 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manok v. Agob’un boyacı esnafına müdahale etmeyeceğine, sandalcı Seyyid mehmed Sâdık’ın kefil olduğu Boyacı ta‘ahhüdü Ma‘rûz Enderûn-ı Hümâyûn Saray-ı cedîde-i âmirede vâki‘ merhûm ve mağfûrun leh Sultan Ahmed tâbe serâhu evkāfı musakkafâtından İslâmbol’da Fazlıpaşa sarayında kâin keremsûd boyacıları esnâfından Rado v. Aleksi ve Panayot v. Kırito ve Zafiri v. Kalyan ve Anton v. Yani ve Simon v. Estiyo ve Yanaki v. Dimitri nâm zimmîler meclis-i şer‘-i münîrde kethüdâları Mehmed Ağa ve yiğitbaşı Kara Mehmed hâzır oldukları hâlde sandalcı esnâfından Manok v. Agob zimmî muvâcehesinde meşdûd tâ‘bir olunur ipek ve harîrden masnû‘ kutnî ve keremsûd elvânıyla pûşîci siyahı ırgacıyla bâzergân ve bezzâz tâifesinin metâ‘ları elvânıyla ve sandalcı metâ‘ı ve pot ve gezî ve Kerbela ve kutnî kadîmü’l-eyyâmdan beri yedimizde olan dört aded kârhânelerde boyamak bize mahsûs olduğu şürût-ı nizâm-ı kadîmimizden olup vesâir mahallerde boyatmayıp bu vechile keremsûd sıbâgatı bize mahsûs ve mu‘ayyen iken mesfûr Manok zimmî kendi san‘atına kanâ‘at etmeyip hilâf-ı emr-i âlî kalb ve redî olarak keremsûd sibağ ve ibâdullâhı ızrâr etmekle suâl olunup ba‘de’l-yevm keremsûd sibağ etmemek üzere mesfûr Manok zimmîye tenbîh olunması murâdımızdır dediklerinde mesfûr Manok zimmîye ba‘de’l-yevm kendi san‘atıyla meşgūl ve keremsûd sibağ etmemek üzere ta‘ahhüd ve eğer ta‘ahhüdünün hilâfı harekette bulunur ise vaz‘-ı kürek ile tedib olunacağı kendiye ba‘de’t-tefehhüm mesfûr Manok zimmî ber-vech-i muharrer ta‘ahhüdünde sâbit-kadem olup hilâfı hareket etmemek üzere sandalcı es-Seyyid mehmed Sâdık b. el-Hâc Cafer tekeffül etmekle mersûmûn şikâyetlerinden fâriğler olduğu İslâmbol Mahkemesi’nden huzûr-ı âlîlerine i‘lâm olundu. Fî-19 min-Şevvâli’l-mükerrem sene 1216