İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 144 Hüküm no: 117 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Hüseyin’in, Sultan Abdülhamid Han vakfından kiraladığı kasap dükkânını İbrahim b. Mustafa’ya devrettiği Kasab Ferağı Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân hazretleri evkāfı musakkafâtından Yedikule hâricinde kâin sekizinci selhhâneye merbût İstanbul’da tavuk pazarında vâki‘ bir bâb kasab dükkânı derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûmeye bâ-temessük-ı vakıf mutasarrıf olan Ömer b. el-Hâc Hüseyin meclis-i şer‘-i münîrde hâssa kasabbaşısı İzzetlü Mustafa Ağa tarafından vekîli kasablar kethüdâsı es-Seyyid Halil Ağa ve ustalarından mazbûtü’l-esâmî kimesneler hâzır oldukları hâlde kasab ustalığını idâreye kādir idüğü ihbâr olunan İbrahim b. Mustafa mahzarında takrîr-i kelâm edip ber-vech-i muharrer mutasarrıf olduğum âlât-ı lâzıme-i ma‘lûmemi kendi hüsn-i rızâ ve ihtiyârımla bedel-i ma‘lûm ve makbûz mukābelesinde mezbûr İbrahim’e bâ-re’y-i mütevellî ferağ ve tefvîz eylediğimde ol dahi ber-vech-i muharer tefevvüz ve kabûl edip ba‘de’l-yevm gedik tâ‘bir olunan âlât-ı lâzıme-i ma‘lûmede benim aslan ve kat‘an alâka ve medhalim kalmayıp mezbûr İbrahim’in dâhil-i havza-i tasarrufu olmuşdur dedikde ol dahi ba‘de’t-tasdîk zikr olunan âlât-ı lâzıme-i ma‘lûmeler mezbûr İbrahim üzerine defter-i vakfa kaydolunup yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-2 min-Zilka‘de sene [1]216