İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 144 Hüküm no: 118 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim ve kardeşi Seyyid Ebûbekir’in, Sultan Abdülhamid Han vakfından kiraladıkları kasap dükkânını Osman ve Mustafa’ya devrettikleri Kasab Ferağı Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân hazretlerinin evkāfı musakkafâtından Yedikule hâricinde kâin beşinci selhhâneye merbût İslâmbol’da Lanka Yenikapısı hâricinde vâki‘ bir bâb kasab dükkânı derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûmeye iki kıt‘a vakıf temessükü mantûkunca münâsafaten mutasarrıflar olan es-Seyyid İbrahim ve karındaşı es-Seyyid Ebûbekir ibney es-Seyyid Mustafa meclis-i şer‘-i münîrde hâssa kasabbaşısı İzzetlü Mustafa Ağa tarafından vekîli kasablar kethüdâsı es-Seyyid Halil Ağa ve ustalarından mazbûtü’l-esâmî kimesneler hâzır oldukları hâlde kasab ustalığını idâreye kādirler olduğu ihbâr olunan Osman b. Mehmed ve Mustafa b. İsa nâm kimesneler mahzarlarında mezbûr es-Seyyid İbrahim ber-vech-i muharrer mutasarrıf olduğum âlât-ı lâzıme-i ma‘lûmeden nısf hissemi mezbûr Osman’a ve merkūm es-Seyyid Ebûbekir ben dahi mutasarrıf olduğum nısf hissemi işbu mezbûr Mustafa’ya hüsn-i rızâ ve ihtiyârımızla bedel-i ma‘lûm ve makbûz mukābelesinde bâ-re’y-i mütevellî ferağ ve tefvîz eylediğimizde onlar dahi ber-vech-i muharrer tefevvüz ve kabûl etmeleriyle ba‘de’l-yevm gedik tâ‘bir olunan âlât-ı lâzıme-i ma‘lûmede bizim aslan ve kat‘an alâka ve medhalimiz kalmayıp mezbûrân Osman ve Mustafa’nın dâhil-i havza-i mutasarrıfları olmuşdur dediklerinde onlar dahi ba‘de’t-tasdîk zikr olunan âlât-ı lâzıme-i ma‘lûme mezbûrân Osman ve Mustafa üzerlerine defter-i vakfa kayd-birle yedlerine temessük i‘tâsını istid‘â eyledikleri İslâmbol Mahkemesi’nden huzûr-ı âlîlerine i‘lâm olundu. Fî-2 Zilka‘de sene [1]216