İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 145 Hüküm no: 119 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Un kapanı tüccarlarının, kalafatçı esnafından şikâyetlerini geri almaları Kapan-ı dakīk tüccârının şikâyetlerinden fâriğler oldukları Ma‘rûz Kapan-ı dakīk tüccârından ashâb-ı sefâyîn el-Hâc Ömer Ağa b. Mustafa ve Kalafatzâde İsmail Ağa ve el-Hâc Mehmed Emin Ağa ve Kırımî el-Hâc İsmail ve Tophaneli İbrahim ve el-Hâc Hüseyin ve es-Seyyid el-Hâc Osman ve Mustafa ve el-Hâc Abdullah ve es-Seyyid Mehmed Tahir Ağa ve Elli altı Mustafa nâm kimesneler meclis-i şer‘-i hatîrde kalafatçılar esnâfının hâlâ kethüdâsı el-Hâc İsmail b. Mustafa ve sâbıkā kethüdâ Mehmed ile ustalarından İsmail ve el-Hâc Ali ve Saka Mehmed ve Abdülkerim ve Mustafa ve İbrahim ve Salih vesâirleri hâzır oldukları hâlde zift tüccârından el-Hâc Mehmed Ağa ve diğer el-Hâc Mehmed ve el-Hâc Mustafa ve Molla Hüseyin ve Çıracı Mustafa ve Hâfız Mehmed nâm kimesneler muvâcehelerinde Der-aliyye’de olan ibâdullâhın akvāt-ı yevmiyyeleri için sevâhil-i Tuna’dan ve Bahr-ı siyah’tan zahîre celbi için yedimizde bulunan sefâyîn kalafata muhtâc ve kalafatın cüz-i a‘zamı zift olmağla tüccâr-ı merkūmun diyâr-ı âharda olan ameleleriyle ittifâk ve ihrâc eyledikleri zift derûnuna ahcâr vaz‘ etmeleriyle kalafat için izâbe olundukda yirmi vakıyyesinde beş vakıyye sâfi zift mâ‘adâsı ahcârdan ibâret olmağla bu vechile bizler mutazarrır ve zehâirin celbinde ve tehîr ve terâhîye bâ‘is olmalarıyla men‘ ü def‘ olmasını istid‘â eylediklerinde tüccâr-ı merkūmun dahi hâl-i minvâl-i meşrûh üzere olduğunu ba‘de’l-i‘tirâf yedlerinde mağşûş bulunan zifti harc ve sarfla târih-i i‘lâmdan doksan bir güne değin sâfi ve a‘lâ olmak üzere zift getirip bey‘e ta‘ahhüd ve eğer zift getirmekde tekâsül ve terâhî-birle Âsitâne-i aliyyede zift husûsunda muzâyaka rûnümâ olur ise kezâlik kalafatçı ustaları dahi va‘de-i merkūme hulûlünde zikr olunan vechile ahcâr ile memlû yedlerinde mevcûd ziftleri kalır ise izâbe ve tathîr ve ashâb-ı sefâyîne ol hâl ile bey‘e her birleri başka başka ta‘ahhüd edip hilâf-ı ta‘ahhüd harekete mütecâsir olanlar taraf-ı devlet-i aliyye[den] tedîbât-ı lâyıkaları icrâsına râzılar olmalarıyla kapan-ı tüccârı merkūmun dahi bu vechile şikāyetlerinden fâriğler olduklarını takrîr ve her birleri âharı tasdîk eyledikleri İstanbul Mahkemesi’nden huzûr-ı âlîlerine i‘lâm olundu. Fî-5 min-Zilka‘deti’ş-şerîfe sene [1]216