İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 146 Hüküm no: 120 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin b. Mustafa’nın, Bağdatlı Hacı Mustafa b. Mehmed’e olan borcunu ödemesi gerektiği Ma‘rûz Tüccârdan Bağdâdî el-Hâc Mustafa b. el-Hâc Mehmed meclis-i şer‘-i hatîrde sâbıkā Çubukçular kethüdâsı el-Hâc Mehmed Emin b. Mustafa mahzarında çubukçu esnâfından gāibûn ani’l-meclis Kuşçuoğlu Süleyman ve Kıbtîler kethüdâsı Hasan ve Arnavud Abdullah nâm kimesne zimmetlerinde semen-i mebî‘den sekiz yüz beş guruş alacağım olup dâyînler merkūmun deyn-i mezkûrlarıyla beni merkūm el-Hâc Mehmed Emin üzerine beşimiz bir meclisde iken havâle-i mutlaka-yı sahîha ile havâle ve herbirimiz havâle-i mezkûreyi ba‘de’l-kabûl meblağ-ı mezkûr sekiz yüz beş guruşu işbu sene-i mübâreke Cumâdelûlâsı gurresinden beher şehr gāyetinde bana otuz beşer guruş vermek üzere merkūm el-Hâc Mehmed Emin te’cîle tâlib olduğunda ben dahi rızâmla imhâl ve te’cîl etmişdim el-hâletü hâzihi târih-i mezkûrdan işbu târih-i i‘lâm-ı şehrî gāyetine gelince altı ayda zimmetinde müctemi‘a olan iki yüz on guruşun bir aylık otuz beşer guruşunu bana edâ etmekle bâkīsi olan yüz yetmiş beş guruşu merkūm el-Hâc Mehmed Emin’den hâlâ taleb ederim deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr lâkin müdde‘î-i merkūm el-Hâc Mustafa meblağ-ı muhtâlün-bih-i mezkûreden benim zimmetimi ibrâ ve iskāt etmişdi deyü ba‘de’d-def‘ ve’l-inkâr dâfi‘-i mezbûr ber-vech-i muharrer def‘ini isbât için kirâren ve mirâren ba‘de’l-istimhâl ve’l-imhâl müddet-i mehl-i şer‘î mürûr ve ityân-ı beyyineye kādir ve tahlîfe dahi tâlib olmamağla mûcebince dâfi‘-i merkūm el-Hâc Mehmed Emin def‘-i mezkûruyla bilâ-beyyine mu‘ârazadan ba‘de’l-men‘ ikrâr u i‘tirâfıyla lâzım gelen yüz yetmiş beş guruşu hâlâ ve müdde‘âsını ber-vech-i muharrer müeccelen müdde‘î-i mezbûra edâ ve teslîme merkūm el-Hâc Mehmed Emin’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-gurre-i Zilka‘de sene [1]216