İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 147 Hüküm no: 121 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. İvaz’ın Rüstempaşa Vakfı’na ait dükkân gediklerinin tasarruf hakkını Bağdatlı Mehmed Emin b. Abdullah’a devrettiği Oda Ferağı Ma‘rûz İslâmbol’da Kumkapı dâhilinde Balipaşa Mahallesi’nde mütemekkin Arakil v. İvaz nâm zimmî meclis-i şer‘-i münîrde Bağdâdî el-Hâc Mehmed b. Harbutî Abdullah mahzarında takrîr-i kelâm edip mahmiye-i mezbûrede Mahmudpaşa Câmi‘-i şerîfi kurbünde merhûm Rüstempaşa Evkāfı müstağallâtından sultan odaları demekle ma‘rûf han derûnunda kâin fevkānî ve tahtânî altmış bir bâb oda ve kahvehâne ve han-ı mezkûr dâhilinde kapı arasında vâki‘ iki bâb dükkânlar ve hâricinde altı bâb dükkânlarda mevcûde gedik tâ‘bir olunur işbu bir kıt‘a fermân-ı âlî mantûkunca mülk-i müşterâm olan âlât-ı lâzıme-i ma‘lûmeden han-ı mezkûrda fevkānî yedi bâb oda ve tahtânî on yedi bâb oda ve kapı arasında bir bâb dükkân ve han-ı mezkûr hâricinde üç bâb dükkân gedikleri olan âlât-ı lâzıme-i ma‘lûmelerimi bundan akdem semen-i ma‘lûme ve makbûza bâ-i‘lâm-ı şer‘î âhara bey‘ etmişdim el-hâletü hâzihi han-ı mezkûrun sol tarafında tabaka-i ulyâsında olan dördüncü ve beşinci iki bâb oda derûnunda mevcûde gedik tâ‘bir olunur âlât-ı lâzıme-i ma‘lûmelerimi bi-safkatin vâhidetin işbu merkūm Bağdâdî el-Hâc Mehmed’e bin yüz guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediklerinden sonra mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini kabûlü hâvi ibrâ ve iskāt eyledik ba‘de’l-yevm zikr olunan odalar gediği âlâtında benim alâka ve medhalim kalmayıp merkūm el-Hâc Mehmed’in mülk-i müşterâsı olmuşdur deyü ba‘de’l-ikrâr ve’t-tasdîk mârrü’l-beyân odaların gediği mersûm Arakil zimmî üzerinden ref‘ ve terkīn ve merkūm el-Hâc Mehmed üzerine kayd ve yedine sûret i‘tâ buyrulmasını istid‘â eyledikleri İslâmbol Mahkemesi’nden huzûr-ı âlîlerine i‘lâm olundu. Fî-5 min-Zilka‘de sene [1]216