İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 148 Hüküm no: 123 Orijinal metin no: [16b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın teknecilik sanatını icra etmesine müdahale edilmemesi için tenbih Fîmâ ba‘d mümâna‘at etmemeğe ta‘ahhüd Ma‘rûz Hasan b. Abdullah meclis-i şer‘-i münîrde Tekneciler Kethüdâsı Hâfız Mehmed Efendi b. Hüseyin ve yiğitbaşıları Hacı Hasan b. Mahmud ve esnâf-ı mezkûre ustalarından el-Hâc Mehmed Ağa b. Hasan ve es-Seyyid Hüseyin Alemdâr b. İbrahim nâm kimesneler muvâcehelerinde takrîr-i kelâm edip ben tekne vukū‘una iştirâ ve bey‘ murâd eylediğimde esnâf-ı merkūmûn beni bey‘den men‘ ve kesbime mümâna‘at etmeleriyle suâl olunup benim bey‘ ü iştirâya mümâna‘at etmemek üzere esnâf-ı merkūmûna tenbîh olunması murâdımdır dedikde takrîri şer‘-i şerîfe muvâfık ve men‘ ve inhisâr-ı bey‘ u şirâ husûsunda şerefrîz-i sudûr eden hatt-ı şerîfe muvâfık olmağla fîmâ ba‘d esnâf-ı merkūmûn mezbûr Hasan’ın ber-vech-i muharrer bey‘ u şirâsına mümâna‘at etmemek üzere her biri ta‘ahhüd eyledikleri İslâmbol Mahkemesi’nden huzûr-ı âlîlerine i‘lâm olundu. Fî-5 min-Zilka‘de sene [1]216