İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 149 Hüküm no: 125 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa Ağa b. Mehmed Emin’in uncu kethüdalığına tevcihi Uncu kethüdâsı Ma‘rûz Âsitâne-i aliyyede uncu esnâfından el-Hâc Mehmed Emin Ağa b. Hüseyin ve Mehmed b. Ali ve es-Seyyid el-Hâc Süleyman ve Molla Esir ve es-Seyyid İsmail ile ustalarından Artin v. Naharet ve Begos v. Kiragos ve Mıgırdıç v. Mosis ve Avanis v. Anparson ve Haçok v. Artin nâm zimmîler meclis-i şer‘-i münîrde esnâf-ı mezkûreden es-Seyyid Mustafa Ağa b. es-Seyyid el-Hâc Mehmed Emin hâzır olduğu hâlde her biri takrîr-i kelâm edip Âsitâne-i aliyye ve bilâd-ı selâsede kâin uncular esnâfının bilâ-ta‘yîn bâ-berât kethüdâsı olan müteveffâ el-Hâc Mustafa b. Ali nâm kimesne hayatında kethüdâlık-ı mezkûru bin iki yüz altı senesi Recebi’l-ferdi gurresinde ol târihde İslâmbol kādısı olan merhûm Cevdet Halil Efendi’nin huzûrunda es-Seyyid Mehmed b. Osman nâm kimesneye ferağ ve kasr-ı yed etmekle kasr-ı yedinden tevcîh buyrulmak üzere merkūm es-Seyyid Mehmed yedine işbu bir kıt‘a i‘lâm i‘tâ olunup lâkin merkūm es-Seyyid Mehmed berâta rağbet etmeyip kethüdâlık umûrumuzu rü’yet eder iken bu esnâda umûr-ı esnâfı rü’yetden âciz olmağla hâzır-ı merkūm es-Seyyid Mustafa Ağa esnâfımızdan emin ve mu‘temed ve muhtârımız olup her vechile umûr-ı esnâfı rü’yete kādir olmağla esnâfımız üzerine kethüdâ nasb ve ta‘yîn olunmasını istid‘â eylediklerine binâen kethüdâlık-ı mezkûr müteveffâ-i mezbûr el-Hâc Mustafa’nın mahlûlünden ve mezbûr es-Seyyid Mehmed’in adem-i rağbetinden merkūm es-Seyyid Mustafa Ağa’ya tevcîh ve yedine berât-ı âlişân inâyet ve ihsân buyrulması niyâzında oldukları İslâmbol Mahkemesi’nden huzûr-ı âlîlerine i‘lâm olundu. Fî-21 min-Şevvâl sene [1]216