İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 149 Hüküm no: 126 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Osman’ın, Şerife Ayşe bt. Seyyid Mustafa aleyhine açtığı davasını ispat edemediğinden muarazadan men edildiği Ma‘rûz İslâmbol’da Çıkrıkçı Kemal Mahallesinde sâkine zâtı mu‘arrefe Hatice bt. Osman nâm Hatun meclis-i şer‘-i münîrde hâletesi Şerîfe Âişe bt. es-Seyyid Mustafa nâm Hatunun zevci ve tarafından ber-vech-i âtî husûmet ve redd-i cevâba vekîl olduğu zâtını ârifân es-Seyyid Ali Efendi b. es-Seyyid Mustafa ve Mehmed Said b. İsmail şehâdetleriyle ber-nehc-i şer‘î sâbit olan eşrâf-ı kuzât-ı Mısriyyeden Kassâm-ı askeri başkâtibi es-Seyyid Mehmed Efendi b. es-Seyyid el-Hâc Mehmed mahzarında ben ücret ile hizmet eder makūleden olmayıp hâletem müvekkile-i mezbûre bundan akdem bana gel menzilimde bir ay ikāmet eyle demekle ben dahi menziline gidip dört sene kendiye hizmet etmemle müddet-i mezkûrede iktizâ eden ecr-i mislimi talep ederim deyü tasaddî eylediği da‘vâsı takrîr-i meşrûhu üzere ücret mukāvele olunmayıp ve kendisi ücret ile hizmet eder makūleden olmadığını mu‘terife iken meşrû‘a olmamağla kelâmına iltifât olunmayıp bî-vech mu‘ârazadan ba‘de’l-men vekîl-i merkūm es-Seyyid Mehmed Efendi müdde‘iye-i mezbûrenin malından yedinde olan bir elmaslı çiçek ve bir kırmızı tülbent çorabı müdde‘iye-i mezbûreye meclis-i şer‘de teslîm ol dahi kabz eylediği İslâmbol Mahkemesi’nden huzûr-ı âlîlerine i‘lâm olundu. Fî-selh-i Şevvâli’l-mükerrem sene 1216