İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 150 Hüküm no: 128 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tülbentçi Kirkor v. Matos’un, Bedros v. Ananes ile aralarındaki anlaşmazlıkta sulh oldukları Ma‘rûz Mübârek rikāb-ı kamer-tâb-ı hüsrevânîye takdîm-i arzuhâl eden Tülbentçi Kirkor v. Matos zimmî meclis-i şer‘-i münîrde arzuhâlde mastûr tülbentçi Bedros v. Avanis zimmî muvâcehesinde İstanbul’da Uzunçarşı’da vâki‘ Uşâkīzâde dükkânı ittisâlinde kâin bir bâb dükkân taht-ı icâremde ve derûnunda olan gedik âlâtı müstakillen mülküm olmağla dükkân ve âlât-ı gediği beher mâh yirmi altışar guruşa mersûm Bedros zimmîye îcâr ve teslîm ve icâre-i mezkûresini mersûm Bedros zimmîye semen-i mebî‘den deynim olan beş yüz guruşa takās olunmak üzere mukāvele etmişdik el-hâletü hâzihi dükkân-ı mezkûr icâresinden işbu târih-i i‘lâm-ı şehri gāyetine gelince on üç ayda zimmetinde müctemi‘a olan üç yüz kırk dört guruş deyn-i mezkûruma ba‘de’t-takās deyn-i bâkim olan yüz elli altı guruşu dahi kendiye edâya ben müte‘ahhid olup ve icâre-i mezkûreyi gāyet-i şehr-i mezkûrdan feshetmemle dükkân-ı mezkûru bana teslîme mersûm Bedros zimmîye tenbîh olunması murâdımdır deyü da‘vâ eylediğimde ol dahi cevâbında kaziyye minvâl-i muharrer üzere olduğunu ikrâr ve gāyet-i şehr-i merkūmda dükkân-ı mezkûru tahliyye ve bana teslîme ta‘ahhüd eyledi deyü takrîrini mersûm Kirkor zimmî tasdîk ve bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-7 min-Zilka‘de sene [1]216