İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 151 Hüküm no: 129 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kebapçı Ahmed Usta b. Hasan’ın kebapçı dükkânında tennûr kebabı pişirip satmasına izin verildiği Tennûr kebabı tabhına ruhsat Ma‘rûz İslâmbol’da Tahtakale kurbünde Kebabcı Ahmed Usta b. Hasan meclis-i şer‘-i münîrde Kebabcı ve hoş-âbcı esnâfının kethüdâsı es-Seyyid Hasan Ağa ve yiğit başıları Ali Ağa ve el-Hâc Ali Usta ve Ahmed ve Mehmed ve Hüseyin mahzarlarında ben gediğine mutasarrıf olduğum kebabcı dükkânında tennûr kebabı ve hoş-âb tabh ve bey‘ murâd eylediğimde esnâf-ı merkūmun senin dükkânında tennûr kebabı ve hoş-âb gediği yokdur deyü beni men‘ ve kâr u kesbime mümâna‘at etmeleriyle suâl olunup mümâna‘atları men‘ ü def‘ olunması murâdımdır deyü da‘vâ ettikde kethüdâ-yı merkūm cevâbında müdde‘î-i mezbûrun gediğine mutasarrıf olduğu dükkân gediği ancak ocak kebabı tabh etmek üzere defterimizde mukayyed olmağla tennûr kebabı ve hoş-âbcı gediği olmamağla men‘ ederiz demeleriyle bir kimesneyi kâr u kesbden men gayr-ı meşrû‘ ve inhisâr-ı bey‘ u şirâ şerefrîz-i sudûr eden hatt-ı hümâyûn ile merfû‘ olmağla esnâf-ı merkūmûnun kelâmlarına iltifât olunmayıp müdde‘î-i mezbûr Ahmed Usta’nın tennûr kebabı ve hoş-âb tabh ve bey‘ u şirâsına mümâna‘at etmemek üzere esnâf-ı merkūmûna tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-7 min-Zilka‘de sene [1]216