İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 152 Hüküm no: 130 Orijinal metin no: [17b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cerrahbaşı Mehmed Efendi vakfına ait bahçıvân odasına Şeyh Yavusi Vakfı’nın müdahale etmemesi gerektiği Bahçıvân odasından keff-i yedine tenbîh Muhrec şüde fî-8 S sene [12]58 Ma‘rûz Sâdır olan fermân-ı âlîlerine imtisâlen zikri âtî husûsun mahallinde bi’l-mu‘âyene istimâ‘ ve fasl ve hasmı için kıbel-i şer‘den me’zûnen mürsel kâtib-i sâni Merhabâzâde Mahmud Efendi evkāf müfettişi mevâlî-i izâmdan faziletlü Mehmed Su‘ada Bey Efendi tarafından mürsel Kâtib Abdullah Efendi ile İstanbul’da Sultan Selim Câmi‘-i şerîfi civârında Çukurbostan derûnunda vâki‘ münâza‘un-fîh bostana varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eylediklerinde nezâret-i hazret-i Şeyhülislâm sellemehü’s-selâmîde âsude evkāfdan Müezzinzâde demekle ma‘rûf ser-cerrâhin-i hâssa Mehmed Efendi vakfının ber-vech-i meşrûta mütevelliyesi sâhibe-i arzuhâl zâtı mu‘arrefe Şerîfe Hibetullah bt. Mehmed nâm hatun meclis-i ma‘kūd-ı mezkûrda Şeyh Yavsi Vakfı’nın mütevellîsi arzuhâlde mezkûr es-Seyyid eş-Şeyh Abdülhâlık Efendi b. es-Seyyid Mehmed Haşim Efendi mahzarında mahâll-i mezkûrda Şeyh Yavsi vakfından olmak üzere bi’l-îcâreteyn mutasarrıf olan hâlâ Kaptanıderya Devletlü Gāzi Hüseyin Paşa hazretlerinin Çukadârı Mehmed Emin Efendi b. Mustafa tarafından vekîli Yakup b. İbrahim hâzır oldukları hâlde işbu derûnunda akd-i meclis-i şer‘ olunan bir tarafdan ba‘zen Şeyh Yavsi vakfından bostan ve ba‘zen Çubukçular Hânı ve bir tarafdan ba‘zen tarîk-i âm ve ba‘zen Osman menzili ve bir tarafdan ba‘zen yine Şeyh Yavsi Vakfından Muvakkit Mehmed Efendi ve ba‘zen kemerbaşı Mehmed Efendi ve ba‘zen İbrahim menzilleri ve bir tarafdan Yemenici Osman menzili ile mahdûd bir kıt‘a bostanın zikr olunan Çubukçular hânı cânibinde vâki‘ tahmînen yüz altmış zirâ‘ bir bâb bahçıvân odası mütevelliyesi olduğum sâlifü’z-zikr Cerrâhîn-i hâssa Mehmed Efendi Vakfı müsakkafâtından iken mütevellî-i mezbûr Şeyh Yavsi Vakfı müsakkafâtından olmak üzere zabt ve müvekkil-i mezbûr Mehmed Emin Efendi îcâr etmekle kasr-ı yedine tenbîh olunmak bi’t-tevliye matlûbumdur deyü ba‘de’d-da‘vâ ve’l-istintak ve’l-inkâr müdde‘iye-i mütevelliye-i merkūme Hibetullah ber-vech-i muharrer müdde‘âsını udûlden olup şehâdetleri makbûle olan mahalle-i mezbûre ahâlîsinden Mehmed Beşe b. Ömer ve Kahveci diğer Mehmed Beşe b. Hasan ve Berber İbrahim b. İbrahim ve el-Hâc Hâfız Ömer Efendi b. İbrahim ve Ahmed Beşe b. Hasan nâm kimesneler ile isbât etmeğin mûcebince zikr olunan bahçıvân odasından keff-i yedine mütevelli-i merkūm es-Seyyid eş-Şeyh Abdülhâlık Efendi’ye ba‘de’t-tenbîh mütevelli-i mezbûr es-Seyyid eş-Şeyh Abdülhâlık Efendi zikr olunan bahçıvân odası vakf-ı mezkûr müsakkafâtından olduğunu tasdîk eylediğini mevlânâ-yı mezbûrân mahallinde ketb ve tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri İstanbul Mahkemesi’nden huzûr-ı âlîlerine i‘lâm olundu. Fî-gurre-i Zilka‘de sene [1]216