İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 153 Hüküm no: 132 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Davud b. Ahmed’in, karısı Sâdıka bt. Abdullah’tan satın aldığı ev ve eşyalarını geri vermesi gerektiği Ma‘rûz İslâmbol’da Çerağī Hamza Mahallesi’nde sâkine mu‘arrefetü’z-zât alile Sâdıka bt. Abdullah nâm hatun meclis-i şer‘-i münîrde zevci Kayseriyeli es-Seyyid el-Hâc Davud b. Ahmed mahzarında mahalle-i mezbûrede Sivâsî Tekyesi havlusu ittisâlinde arsası tekye-i mezkûre vakfına senevî yüz yirmi akçe mukāta‘alu ve üzerinde olan bi’l-cümle ebniyesi mülküm olmağla ebniye-i mezkûre ile arsası merhûme Hümâ Hatun vakfına senevî<< yüz yirmi atçe mukāta‘lu>> altmış akçe mukāta‘alu olan Cebecibaşı Mahallesi’nde vâki‘ bir bâb menzilin binâsını ve malımdan bâ-defter-i müfredât eşyâ-i ma‘lûmemi ölünce bana bakmak şartıyla zevcim mezbûr es-Seyyid el-Hâc Davud’a iki bin guruşa bey‘ ve temlîk ve teslîm ve semeni mütâlebesinden zimmetini ibrâ ve iskāt eylediğimden sonra merkūm es-Seyyid el-Hâc Davud tekye-i mezkûre ittisâlinde olan menzilin ebniyesini tekye-i mezbûre vakfının mütevellîsi es-Seyyid eş-Şeyh Abdülhâlık Efendi’ye ve Cebecibaşı Mahallesinde olan menzilin ebniyesini Mustafa nâm kimesne bey‘ ve teslîm eylediğinden sonra mârru’z--zikr Sivâsî Tekyesi ittisâlinde olan menzili mütevellî-i mûmâ-ileyhden kendisi vakfiyet üzere istîcâr etmişdi el-hâletü hâzihi şart-ı mezkûr ile olan bey‘in fesâdına binâen menzil-i mezkûr ile eşyâ-i muharrere-i mezkûreyi taleb ederim deyü mütevellî-i mûmâ-ileyh tarafından sâbitü’l-vekâle vekîli olan el-Hâc Mehmed Efendi b. Feyzullah hâzır olduğu hâlde da‘vâ ve müdde‘âmı şâhidîn-i mu‘âddilîn şehâdetleriyle ba‘de’l-isbât merkūm <> es-Seyyid el-Hâc Davud dahi kaziyye minvâl-i muharrer üzere olunduğunu tasdîk ve eşyâ-i mezkûreden iki fener ve bir semmur ve bir kâkım kürk ve bir sincab kürk ve iki anteriden mâ‘adâ sâir eşyâları bana teslîm ben dahi kabz etmişdim el-hâletü hâzihi yedinde olan üç kürk ve iki anteri ve iki fener ile mahalle-i mezbûrede olan menzili bana teslîm etmemekle teslîmine tenbîh olunmak matlûbumdur deyü da‘vâ ettikde merkūm es-Seyyid el-Hâc Davud dahi cevâbında müdde‘iye-i mezbûrenin ber-vech-i muharrer müdde‘âsını ikrâr u i‘tirâf etmekle mûcebince eşyâ-i muharrere-i mezkûre ile tekye-i mezkûre civârında olan menzilden keff-i yed ve müdde‘iye-i mezbûre Sâdıka Hatun’a teslîme merkūm es-Seyyid el-Hâc Davud’a tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-15 Ramazan sene [1]216