İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 154 Hüküm no: 133 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Abdülmümin’in, babasından miras kalan tütüncü dükkânı gediğini Osman Ağa b. İsmail’e devrettiği Nakl-i tütüncü Ma‘rûz Medîne-i Üsküdar’a muzâfe Çengel karyesinde sâkin iken bundan akdem vefât eden Duhânî Mehmed b. Abdülmümin’in sulbî oğlu ve hasran vârisi olan Bostani Abdülmümin meclis-i şer‘-i münîrde karye-i mezbûre ustası Osman Ağa b. İsmail mahzarında karye-i mezbûrede çörekçi fırını kurbünde vâki‘ maden kaleminde Küçük Mehmed dükkânı demekle mukayyed bir bâb tütüncü dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme babam müteveffâ-i mezbûrun ile’l-vefât yedinde mülk ve hakkı olup ba‘de vefâtihi hasran bana mevrûs olmuşdu el-hâletü hâzihi âlât-ı gedik-i mezkûru tarefeynden bi’l-icâb ve’l-kabûl ve bi-safkatin vâhidetin merkūm Osman Ağa’ya yüz guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve kabz ve kabûl eyledi deyü ba‘de’l-ikrâr ve’t-tasdîk merkūm Osman Ağa takrîr-i kelâm edip ânifen zikr olunan gedik âlâtını kurb ve civârında Koçoğlu köşesi nâm mahalde vâki‘ gediği bir kimesnenin mülkü olmayan hâli dükkâna naklolunmasını istid‘â ettikde ber-vech-i meşrûh nakli şürûtundan olduğu tütüncüler kethüdâsı İbrahim Ağa ve yiğit başıları Ali Kalfa vesâirleri haber vermekle âlât-ı gedik-i mezkûr mahâll-i merkūma nakl ve kalemine kayd ve yedine sûret i‘tâsı için emr-i âlîleri sudûru ricâsında olduğu İslâmbol Mahkemesi’nden huzûr-ı âlîlerine i‘lâm olundu. Fî-5 min Za sene [1]216