İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 155 Hüküm no: 134 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sagir Mustafa’nın hissesini vasisi ve annesi Zeyneb bt. Ali’ye teslim etmesi için Camcı Ahmed b. İsmail’e tenbih edildiği Sagīr-i mezbûrun hissesini vasîyy-i merkūma teslîmine tenbîh Ma‘rûz Müteveffâ Camcı el-Hâc Abdullah b. el-Hâc Mehmed’in sulbî sagīr oğlu Mustafa’nın vâlidesi ve tesviye-i emrine kıbel-i şer‘den mansûbe vasîsi olan mu‘arrefetü’z-zât Zeyneb bt. Ali nâm Hatun meclis-i şer‘-i münîrde Camcı Ahmed b. İsmail mahzarında İslâmbol’da Sultan Bayezid-i Veli Câmi‘-i şerîfi kurbünde darbhâne fırını karşısında vâki‘ bir bâb camcı dükkânı derûnunda mevcûde beyne’l-esnâf gedik tâ‘bir olunur âlât-ı lâzıme yetmiş iki sehm i‘tibâriyle on yedi sehm mezbûr Ahmed’in ve elli beş sehmi dahi vasîsi olduğum sagīr-i mezbûrun irsen ve şirâen yedinde mülkü olmağla sagīr-i mezbûrun âlât-ı mezkûrede olan elli beş sehmini beher mâh ikişer guruşa mezbûr Ahmed’e îcâr ve teslîm ol dahi istîcâr ve kabûl etmişdi el-hâletü hâzihi îcâre-i mezkûreyi gāyet-i şehr-i âtîde feshetmemizle âlât-ı mezkûrede olan sagīr-i mezbûrun hissesini bana teslîme mezbûr Ahmed’e tenbîh olunması bi’l-vesâye murâdımdır deyü da‘vâ ettikde ol dahi cevâbında müdde‘iye-i vasiye-i mezbûrenin ber-vech-i muharrer müdde‘âsını ikrâr u i‘tirâf etmekle mûcebince âlât-ı gedik-i mezkûrdan sagīr-i mezbûr Mustafa’nın hissesini vasîyy-i mezbûra teslîme mezbûr Ahmed’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-7 min-Zilka‘de sene 1216