İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 156 Hüküm no: 136 Orijinal metin no: [18a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tavukçuoğlu Nesim’in evinin alt katındaki şerbethanenin kapatılması Balat’ta şerbethâne men‘ ve sedd u bend Ma‘rûz İstanbul’da Balatkapısı dâhilinde Hacı İsa Mahallesi İmâmı Hâfız Mustafa Efendi b. Mehmed ve Müezzini Molla Mehmed Ârif b. Mehmed ve ahâlîsinden Süleyman Efendi ve Hâfız Mustafa b. el-Hâc Ahmed ve Mehmed Tahir b. el-Hâc Mustafa ve imâm vekîli es-Seyyid Mehmed Efendi kuzâtdan İbrahim Efendi ve Hâfız Abdülkādir Efendi ve İsmail Efendi ve Halil Ağa ve diğer Halil ve İbrahim Beşe ve Mehmed Sâdık ve diğer Halil ve Mehmed Necib nâm kimesneler meclis-i şer‘-i münîrde her biri takrîr-i kelâm edip zikr olunan Balatkapısı dâhilinde haffâflar sûku başında Tavukçuoğlu Nesim nâm Yahûdi binâ eylediği menzili tantında bundan akdem şerbethâne ihdâs edip ve bir müddet mürûrunda derûnundan harîk zuhûr etmekle men‘ olunup mesdûd iken menzil-i mezkûru bu esnâda Kuyumcu Agob nâm zimmî tefevvüz ve şerbethâne-i mezkûru küşâd ve irâdesinde olup lâkin mahâll-i mezkûr memerr-i nisvân olmağla küşâd olunduğu sûretde nice nice fesâda medârı olmağla bir vechile emniyet ve rahatımız olmayacağı bedîdâr olmağın şerbethâne-i mezkûrun küşâd olunmakdan men‘ ü def‘ olunması murâdımızdır deyü her biri istirhâm etmeleriyle makarr-ı saltanat-ı aliyye olan belde-i İslâmiye’de bu makūle münkirâtın men‘ ü def‘i umûr-ı vâcibeden olmağla rahmen li’l-ibâd ve def‘an li’l-fesâd muhdes olan şerbethâne-i mezkûr min ba‘d küşâd olunmamak üzere izzetlü sekbanbaşı ağa bendelerine hitâben emr-i âlîleri sudûru iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-19 min-Şevvâli’l-mükerrem sene [1]216