İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 156 Hüküm no: 137 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Mustafa’nın, babalarından kalan miras hususunda kardeşi Sarrac Ahmed Ârif’in zimmetini ibra ettiği 50 guruşa sulh ve ibrâ Ma‘rûz Mübârek rikāb-ı kamer-tâb-ı hüsrevânîye takdîm-i arzuhâl eden mu‘arrefetü’z-zât Zeliha bt. el-Hâc Mustafa nâm Hatun meclis-i şer‘-i münîrde li-ebeveyn karındaşı arzuhâlde mezkûr Sarrac Ahmed Ârif nâm kimesne mahzarında bin yüz seksen târihinde ben diyâr-ı âhara azîmetim esnâsında malımdan iki yüz elli guruş nakd ile mecmû‘u üç yüz elli guruş kıymetli bâ-defter-i müfredât eşyâ-i ma‘lûmeyi karındaşım mezbûr yedine emâneten vaz‘ ve teslîm etmemle nakd ve eşyâ-i mezkûre ile verâseti benimle karındaşım mezbûr Ahmed Ârif’e münhasıra olduğu hâlde vefât eden babamız el-Hâc Mustafa b. Mehmed’in terekesinden üç bin guruş nakid ile mecmû‘u yedi yüz guruş kıymetli bâ-defter eşyâ-i ma‘lûmeyi müstekillen ahz ve ketm ve ihfâ etmekle nakid ve eşyâ-i mezkûreden dahi sülüs hisse-i irsiyyemi taleb ederim deyü da‘vâ eylediğimde ol dahi cevâbında babamız müteveffâ-i mezbûrun terekesinden olarak ancak yüz on guruş kabzını ikrâr mâ‘adâlarımı inkârından mâ‘adâsın kendi malından bana emanet vaz‘ eyledim deyü iddi‘â eylediğin eşyâ da‘vâsından benimle an inkâr elli guruş bedel-i makbûzuna bâ-hüccet sulh olup husûs-ı mezkûra ve târih-i hüccet-i merkūma gelince sâir hukūk-ı şer‘iyyeye müte‘allika âmme-i da‘vâdan benim zimmetimi ibrâ ve iskāt etmişdin deyü beni def‘a tasaddî etmekle beynimizde ba‘de vukū‘ı’l-münâza‘a bâ-tavassut-ı muslihîn ben ber-vech-i muharrer tasaddî eylediğim da‘vâ-yı mezkûrelerimden karındaşım mezbûr ile kat‘an li’n-nizâ‘ elli guruş bedel-i makbûza ba‘de akdi’l-musâlahati ve’l-kabûl beynimizde ma‘lûm bir kıt‘a vakfiyeden mâ‘adâ zikr olunan husûslara ve işbu târih-i i‘lâma gelince bi’l-cümle sâir hukūk-ı şer‘iyyeye müte‘allika âmme-i de‘âvî ve mütâlebât ve kâffe-i eymân ve muhâsamâtdan karındaşım merkūm Ahmed Ârif’in zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâmı kabûl eyledi deyü ba‘de’l-ikrâr ve’t-tasdîk bu vechile kat‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-7 min-Zilka‘de sene [1]216