İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 157 Hüküm no: 138 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasiliki bt. Saturi’nin muhâla‘a ile boşandığı kocası Yorgi v. Aydaz’ın zimmetini ibra ettiği Ma‘rûz Mahrûse-i Galata’da Sultan Bayezid Mahallesi mütemekkinelerinden arzuhâl eden Vasiliki bt. Saturi ve anası Fotini bt. Mike nâm Nasrâniyyeler taraflarından husûs-ı âti’l-beyânda vekîl olduğu şahıslarını ârifân Nikola v. İstemad ve Yuvan v. Dimitri nâm zimmîler şehâdetleriyle sâbit olan mesfûr Saturi zimmî meclis-i şer‘-i münîrde arzuhâlde mastûr mersûme Vasiliki Nasrâniyenin zevc-i muhâlı‘ı Manav Yorgi v. Anid zimmî muvâcehesinde mersûm Yorgi zimmî kızım ve müvekkilem mersûme Vasiliki Nasrâniyyenin âyîn-i âtılamız üzere zevc-i dâhili olup lâkin beynlerinde hüsn-i mu‘âşeretleri olmamağla kızım mersûme malından iki bin iki yüz elli guruş bedel-i hul‘ vermek üzere hul‘a tâlibe olduğunda zevci mersûm dahi ber-vech-i muharrer hul‘-ı mezkûru kabûl ve bedel-i hul‘ olan iki bin iki yüz elli guruşun bin iki yüz guruşunu mukaddemâ ve bin elli guruşunu dahi işbu târih-i i‘lâm günü kendiye def‘ ve teslîm ol dahi tamamen ahz u kabz etmekle kızım ve müvekkilem mersûmenin malı olup zevci mersûmun menzilinde olan bâ-defter-i müfredât eşya-yı ma‘lûmesini dahi zevc-i mersûm bi-a‘yanihâ bana def‘ ve teslîm ben dahi tamamen ahz u kabz etmemle hukūk-ı zevciyete ve ibtidâ-yı zevciyetlerinden işbu târîh-i i‘lâma gelince beynimizde cereyân eden cemî‘ ahz u i‘tâya ve bi’l-cümle sâir hukūk-ı şer‘iyyeye müte‘allika âmme-i da‘vâdan ben kendi nefsimden asâleten ve kızım ve müvekkilelerim mersûmetân taraflarından vekâleten mersûm Yorgi zimmînin zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi hukūk-ı zevciyete ve bi’l-cümle sâir hukūk-ı şer‘iyyeye müte‘allika âmme-i de‘âvî ve kâffe-i mütâlebâtdan benimle kızım ve müvekkilelerim mersûmetân Vasiliki ve Fotini Nasrâniyelerin zimmetlerimizi ibrâ-yı âmm ile ibrâ ve iskāt ve her birimiz ber-vech-i muharrer âharın ibrâsını asâleten ve vekâleten kabûl eyledik deyü ba‘de’l-ikrâr ve’t-tasdîk bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-8 min-Zilka‘de sene 1216