İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 163 Hüküm no: 146 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Un kapanı tüccarlarının mağdur edilmemesi için Fundacıların kadimi üzere funda narhına uyması gerektiği Funda i‘lâmı Ma‘rûz Ashâb-ı arzuhâl kapan-ı dakîk tüccârlarından el-Hâc Ömer Ağa b. Mustafa ve el-Hâc Hüseyin Ağa b. Halil ve kalafatzâde İsmail Ağa b. İbrahim ve es-Seyyid el-Hâc Osman Ağa b. Ömer ve Mehmed Ağa b. Mehmed ve el-Hâc Abdullah ve Mustafa b. Hasan ve Hâfız Ali b. Mehmed vesâirleri meclis-i şer‘-i şerîf-i enverde Fundacıbaşı Mehmed b. İsmail ve es-Seyyid Mehmed Sâdık ve karındaşı es-Seyyid İbrahim ibney es-Seyyid Ahmed ve es-Seyyid Mehmed Ârif b. es-Seyyid Mahmud ve hâssa hasekilerinden Mehmed b. Ahmed nâm kimesneler muvâcehelerinde arzuhâl hâmişinde mastûr derkenâr nâtık olduğu üzere Tersâne-i Âmire’de donanma-yı hümâyûn kalyonları ve tüccâr sefînelerinin terhîn ve kalafatlarına iktizâ eden fundayı bâ-fermân-ı âlî nizâmı mûcebince Üsküdar’a tâbi‘ Dudurlu ve Nerdübanlı ve Bulgurlu karyeleri ahâlîleri Üsküdar’a nakl ve kadîmi semeni olan yüz yirmi akçeye on beş akçe dahi zam ile üç yüz demedini yüz otuz beş akçeye merkūm fundacı başı iştirâ eyledikden sonra mahzene vaz‘ ve bir müddet meks ile tamamca koruyup beher demedi iki yüz elli dirhemden noksan olmamak üzere yüz demedini kadîmi semeni olan yüz akçeye yirmi akçe zam ile bir guruşa bize bey‘ edegelmişken şimdi merkūm fundacı başı tama‘-ı hâma teba‘iyyet-birle iki yüz elli dirhem gelecek ve demed yerine ancak kırk dirhem gelir funda demedinin beher yüz demedini bir guruşa verip bu vechile mübtelâ-yı zarar ve hasar olduklarımızdan nâşî bizler dahi bulunduğumuz mahallerden funda iştirâ eylediğimizde mümâna‘at etmeleriyle suâl olunup mümâna‘atları men‘ ü def‘ olunmak matlûbumuzdur deyü da‘vâ ettiklerinde her birleri müdde‘ûn-ı merkūmûnun takrîr-i meşrûhlarını ba‘de’l-i‘tirâf bundan böyle tüccâr-ı merkūmuna cevr ve ezâ etmeksizin bey‘ edecekleri fundayı vezn ve kantar-birle ez kadîm bi’t-terâzi beynlerimizde karâr-gîr olan vechile yaş fundanın beher demedi dört yüz elli ve bey yüz dirhem olup kurudukda iki yüz elli dirhem olmak üzere beher yüz demedini bir guruşa bey‘e ta‘ahhüd ederiz eğer ba‘de-zîn hilâf-ı ta‘ahhüd funda demedlerini mikdâr-ı merkūmdan tenzîl veyâhud gayrı vechile cevr ve ezâ eylediğimizde tüccâr-ı merkūmûn buldukları mahallerden funda iştirâ eylemelerine mümâna‘at ve muhâlefet etmemek üzere her birleri ta‘ahhüd eylediklerini Başmuhâsebe’ye kayd ve tüccâr-ı merkūmûn yedlerine tuğralı emr-i âlî inâyet ve ihsân buyrulmağın istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî-11 Za sene [12]16