İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 164 Hüküm no: 147 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Hamza’nın, Anaştaş v. Kosta’ya borcunu ödemesi gerektiği 450 guruş hüküm Ma‘rûz Rusya orta elçisinin işbu memhûr arzuhâlinde ismi mastûr Anaştaş v. Kosta nâm müste’men meclis-i münîrde Halatçı İsmail b. el-Hâc Hamza nâm kimesne mahzarında merkūm İsmail zimmetinde bundan akdem yedimden ve malımdan iştirâ ve kabz eylediği vezn [ve] kıyyesi beynimizde ma‘lûm tel semeninden bâ-temessük yedi yüz guruş alacağım olmağla meblağ-ı mezkûru hâlâ taleb ederim deyü da‘vâ ettikde ol dahi cevâbında müdde‘î-i mezbûre cihet-i mezkûreden ol mikdâr guruş deyni olup ve temessük-ı mezkûr kendinin olduğunu ikrâr lâkin deynim olan meblağ-ı mezkûr yedi yüz guruşun yüz altmış guruşunu müdde‘î-i mezbûrun emriyle Yazıcısı Yorgaki zimmîye edâ ve teslîm etmişdim deyü ba‘de’d-def‘ ve’l-inkâr dâfi‘-i merkūm İsmail ol mikdârında eylediği def‘ini isbâtdan ızhâr-ı acz ve istihlâf etmekle mersûm Anaştaş’a yemîn teklîf olundukda ol dahi yemînden nükūlüyle sâbit olan yüz altmış guruş meblağ-ı mezkûr yedi yüz guruşdan ba‘de’t-tenzîl bâkīsi olan beş yüz kırk guruşu müste’men-i mersûm Anaştaş zimmîye edâsıyla merkūm İsmail ilzâm olunduğu İslâmbol Mahkemesi’nden huzûr-ı âlîlerine i‘lâm olundu. Fî-25 min-Zilka‘de sene [1]216