İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 165 Hüküm no: 148 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin b. Osman’ın, altın dükkânı gediğinin yarısını Mustafa usta b. Mehmed’e geri teslim etmesi gerektiği Nısf altıncı gediği teslîmine tenbîh Ma‘rûz Altıncı esnâfından ihtiyâr Mustafa Usta b. Mehmed meclis-i şer‘-i münîrde Altıncı Mehmed Emin b. Osman mahzarında İslâmbol’da sandal bezzâzistânı civârında vâki‘ bir bâb dükkân derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme müstakillen yedimde mülküm iken zikr olunan âlâtın nısfını ölünce bana bakıp ve beher yevm bana birer guruş vermek şartıyla mezbûr Mehmed Emin’e üç yüz guruşa bey‘ ve teslîm ve devir sûretinde bir kîse içinde mevzû‘ adedi nâma‘lûm bana bir mikdâr akçe verip ben dahi ol meclisde kendiye red etmişdim el-hâletü hâzihi şart-ı mezkûr ile olan bey‘in adem-i sıhhatine binâen nısf âlât-ı mezkûreyi bana red ve teslîme mezbûr Mehmed Emin’e tenbîh olunmak murâdımdır deyü da‘vâ ettikde ol dahi şart müdde‘âsını inkâr etmekle müdde‘î-i merkūm ber-vech-i muharrer şart müdde‘âsını udûlden oldukları hasmı tasdîkiyle zâhir olan Altıncıbaşı Osman Ağa b. Mehmed ve Altıncı Mehmed Emin Ağa b. Osman nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebiyle nısf-ı âlât-ı mezkûreden keff-i yed ve müdde‘î-i merkūm Mustafa Usta’ya teslîme mezbûr Mehmed Emin’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-13 min Za sene [1]216