İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 166 Hüküm no: 150 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kabakulak Ahmed Çavuş Ağa’nın Muhtesib İskender Mahallesindeki çeşmeye getirdiği suyun mecrasını değiştirilmeyeceği Çeşmeden suyu icraya ta‘ahhüd Ma‘rûz Ashâb-ı arzuhâl İslâmbol’da Karagümrük kurbünde Muhtesib İskender Mahallesi İmâmı Mehmed Emin Efendi b. Ahmed ve ahâlîsinden Na‘lband Ahmed ve Mehmed b. Hasan ve Ömer odabaşı ve Lüleci Mustafa ve Hallâc es-Seyyid Mehmed ve Aşcı Mehmed ve Kırbacı Hasan ve Alemdâr es-Seyyid Ali ve Başçukadâr el-Hâc Mehmed ve Hüseyin odabaşı ve kolçavuşu Hüseyin ve Yorgânî el-Hâc Mehmed ve avârız mütevellîsi Ahmed Usta nâm kimesneler meclis-i şer‘-i münîrde cennet-mekân firdevs-âşiyân Sultan Süleyman Hân hazretlerinin Âsitâne-i aliyyeye icrâ buyurdukları mâ-i lezîz râh-ı âbîlerinin bölük başıları olan Nebi demekle ma‘rûf Mehmed b. Hüseyin mahzarında işbu yedimizde olup bin on beş senesi Zilhiccesinin yirmi yedinci günü târihiyle muvarraha hâslar sicill-i mahfûzundan muhrec bir kıt‘a hüccet-i şer‘iyye ve hâmiş-i arzuhâlde olan derkenâr ve diğer arzuhâlde olan derkenâr ve diğer arzuhâl bâlâsında olup bin yüz yetmiş üç senesi târihiyle muvarrah Havâss-ı Refî‘a Nâibi Ahmed Efendi’nin bir kıt‘a i‘lâmı nâtık olduğu üzere ashâb-ı hayrâtdan Kabakulak Ahmed Çavuş Ağa kazâ-i mezkûrda Cebeciköyü kurbünde Hayreddin Paşa başları tâ‘bir olunan vâdide hafr-ı abâr ile cem‘ ve tahsîl ve mecrâ-yı miyâh-ı Sultânîyye ile mecrâ-yı vâhid ile icrâ ve hakk-ı mecrâsından mâ‘adâ üç kamış ki altı masura eder suyu ba‘zısının kendi menziline ve ba‘zısını mahallemiz mescidi kurbünde binâ eylediği çeşmeye ta‘yîn etmişken bölükbaşı merkūm zikr olunan üç kamış suyu ki altı masuradır mahallerine icrâ etmeyip âhar mahallere icrâ etmekle su husûsunda zarûret çekmemize bâ‘is ü bâdi olur deyü her biri teşekkî eylediklerinde bölükbaşı merkūm dahi tasdîk ve ba‘de’l-yevm üç kamış suyu çeşme-i mezkûreden icrâya ta‘ahhüd eylediği İslâmbol Mahkemesi’nden huzûr-ı âlîlerine i‘lâm olundu. Fî-15 min-Zilka‘de sene 1216