İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 167 Hüküm no: 151 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Ahmed’in, veraseten çocuklarına intikal eden Kıztaşı’ndaki değirmeni işletmesine engel olunmaması gerektiği Değirmen Ma‘rûz Zikri âti değirmene bi’l-îcâreteyn mutasarrıf iken bundan akdem vefât eden es-Seyyid Ali b. Ahmed’in sulbî sagīr evlâdları es-Seyyid Ahmed ve es-Seyyid Mehmed Reşid ve es-Seyyid Mehmed Sâdık’ın anaları ve vasîleri olan zâtı mu‘arrefe Nefise bt. Ahmed nâm hatun meclis-i şer‘-i münîrde hâlâ kapan-ı dakīkde nâibimiz olan müderrisîn-i kirâmdan Abdüllatif Efendi ile uncular kethüdâsı es-Seyyid Mustafa ve Mehmed Usta ve el-Hâc Hasan Usta ve zimmî ustalarından Kirkor ve Artin hâzır oldukları hâlde bi’l-vesâye takrîr-i kelâm edip vasîleri olduğum sıgār-ı mezbûrûna babaları müteveffâ-i mezbûrdan intikāl eden İslâmbol’da Kıztaşı’nda yoğurtçu kârhânesi karşısında vâki‘ değirmenin müstecirleri firâr ve gaybet ve değirmen-i mezkûr müddet-i vâfireden beri mu‘attal kalmağla değirmen-i mezkûru bi’l-vesâye zabt ve tasarruf eylediğimde esnâf-ı merkūme değirmenin deyni vardır deyü zabtıma mümâna‘at etmeleriyle suâl olunup mümâna‘atları men‘ ü def‘ olunması murâdımdır deyü da‘vâ ettikde esnâf-ı merkūmûn cevâblarında değirmen-i mezkûrun olan deynini kurb ve civârında olan değirmenlere tarh ve tahmîl edip ve değirmen-i mezkûr gedikden berî olmağla müdde‘iye-i vasî-i mezbûre Nefise Hatun dilediği gibi zabt ve tasarruf eylesin biz mümâna‘at etmeyiz deyü ta‘ahhüd eyledikleri İslâmbol Mahkemesi’nden huzûr-ı âlîlerine i‘lâm olundu. Fî-11 min Za sene [1]216