İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 167 Hüküm no: 152 Orijinal metin no: [20b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, iki kasap dükkânı gediğinin yarım hisselerinin Mehmed b. Hacı Ömer’in vefâtı üzerine Hacı Osman’a devredilmesi Kassâb Ma‘rûz Hüdâvendigâr-ı sâbık merhûm ve mağfûrun leh Sultan Abdülhamid Hân hazretleri evkāfı musakkafâtından İslâmbol’da cumartesi pazarı civârında hammâm kurbünde kâin iki bâb kasab dükkânı derûnlarında mevcûde gedik tâ‘bir olunan âlât-ı lâzıme-i ma‘lûmenin nısflarına bâ-temessük-ı vakıf <> mutasarrıf olan Mehmed b. Hacı Ömer bilâ-veled fevt olup mutasarrıf olduğu nısf hisseleri mahlûl ve taraf-ı vakfa aid olmağla vakf-ı müşârun-ileyh mütevellîsi kethüdâ-yı mehd-i ulyâ atûfetlü Yusuf Ağa hazretleri tarafından câbi-i vakf Halil Efendi b. Ahmed zikr olunan nısf hisselerini beyne’l-esnâf müzâyede ve gıbbe’l-inkitâ‘i’r-rağbe karındaşı el-Hâc Osman üzerinde iki yüz yetmiş beş guruşda karar-dâde olmağla cânib-i vakıfdan müteveffâ-i mezbûrun zikr olunan nısf hisselerini mu‘accele-i mezkûre-i makbûza ve müccele-i kâdîme-i ma‘lûmesiyle karındaşı el-Hâc Osman’a taraf-ı vakıfdan îcâr olunduğu ilmühaberini vermekle defter-i vakfa karındaşı mezbûr el-Hâc Osman üzerine kayd ve cânib-i vakıfdan yedine temessük i‘tâsını istid‘â eylediği İslâmbol Mahkemesi’nden huzûr-ı âlîlerine i‘lâm olundu. Fî-11 min Za sene [1]216