İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 168 Hüküm no: 153 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, Tophanedeki kasap dükkânı gediğinin yarım hissesinin Giridli Hüseyin’in vefâtı üzerine Memiş’e devredilmesi Kassab Ma‘rûz Hüdâvendigâr-ı sâbık merhûm ve mağfûrun leh Sultan Abdülhamid Hân hazretleri evkāfı musakkafâtından Tophâne-i Âmire kapı derûnunda kâin bir bâb kasab dükkânı derûnunda mevcûde beyne’l-hıref gedik tâ‘bir olunan âlât-ı lâzıme-i ma‘lûmenin nısfına bâ-temessük-ı vakıf mutasarrıf olan Giridî Hüseyin bilâ-veled fevt olup mutasarrıf olduğu nısf hissesi mahlûl ve taraf-ı vakfa âid olmağla vakf-ı müşârun-ileyh mütevellîsi kethüdâ-yı mehd-i ulyâ Atûfetlü Yusuf Ağa hazretleri tarafından vekîli câbî-i vakıf Halil Efendi b. Ahmed zikr olunan nısf hisseyi beyne’l-esnâf müzâyede ve gıbbe inkıtâ‘ı’r-rağbe Memiş üzerinde bin iki yüz elli guruşda karar-dâde olmağla cânib-i vakıfdan müteveffâ-i mezbûrun zikr olunan nısf hissesini mu‘accele-i mezkûre-i makbûza ve müeccele-i kadîme-i ma‘lûmesiyle merkūm Memiş’e taraf-ı vakıfdan îcâr olunduğu ilmühaberini vermekle defter-i vakfa merkūm Memiş üzerine kayd ve cânib-i vakıfdan yedine temessük i‘tâsını istid‘â eylediği İslâmbol Mahkemesi’nden huzûr-ı âlîlerine i‘lâm olundu. Fî-11 min-Zilka‘de sene [1]216